Footer

Aglangoyen ti I.S.D.A. iti Ilocos Sur

Umabot iti 136 a kilometro ti kaatiddog ti coastline ti probinsia nga Ilocos Sur ken addaan daytoy iti 109 a coastal barangays manipud Sinait iti amianan agingga iti ili a Tagudin iti abagatan. Malaksid iti dayta, adu dagiti karayan ken dadduma pay a bagi ti danum ti masarakan iti agduduma a paset ti probinsia kangrunaanna ditan ti Karayan Abra ken Amburayan. Saan ngarud a nakakaskasdaaw nga adu kadagiti umili ti agbibiag babaen ti panagkalap.

Iti laksid ti kinabaknang dagiti kadandanuman ti Ilocos Sur, agkurkurang iti 10% ti suplay ti lames ditoy kas inrakurak dagiti mangimaton iti fisheries iti probinsia. Kayatna a sawen, agang-angkat ti Ilocos Sur iti agduduma a klase ti lames manipud kadagiti kabangibangna a probinsia tapno masupusopan dayta a pagkuranganna.

Binuangay ngarud ni Gov. Deogracias Victor “DV” Savellano ti maysa a grupo a mangtakuat iti rason no apay nga awan umdas a lames iti Ilocos Sur. Ditoy a natakuatanda a saan a nasayaat ti pannakamanehar dagiti kadandanuman isu’t gapuna a nakirang ti makalapan a lames. Adu a mangngalap ti agus-usar iti illegal a pagkalap kas iti panagdinamita iti kabaybayan, panagusar iti bukatot, iket a babassit ti abutna, panagkoriente ken panagsabidong kadagiti karayan ken waig isu a pati dagiti fingerlings ken dagiti bugbugian nga ikan ket mairaman a makalap. Daytoy ti nangitunda iti in-inut nga ibabassit ti lames. Maysa pay a natakuatanda, umadun nga umadu ti populasion nga agkasapulan iti taraon.

Maysa ngarud a programa ti inrusat ti gobierno probinsial ti Ilocos Sur tapno maikkan solusion ti dumakdakkel a parikut ti panagkurang ti lames. Daytoy ti Ilocos Sur Development of Aquamarine wenno I.S.D.A. Itoy a programa, agibulos ti gobierno probinsial babaen ti panangidaulo ti Provincial Agriculture Office iti tilapia fingerlings kadagiti amin a bagi ti danum iti sibubukel a probinsia.

Ngem sakbay nga inrugida ti agibulos, kinasarita ni Gov. DV amin a kapitan ti 768 a barangay iti probinsia tapno mangipasada iti ordinansa iti masakupanda a mangipawil iti panagusar iti illegal a pagkalap tapno masigurado a dumakkel ken umadu dagiti ibulosda. Apaman a napaadda ti dawatna ken nainspeksion ti agriculture office dagiti bagi ti danum, dagus metten a nagorder ti gobernador iti fingerlings ti tilapia sadiay Muños, Nueva Ecija. Wen, saan a gagangay a tilapia dagiti ibulosda no di dagitay dadakkel a klase.

Kinuna ni Gov. Savellano a saan laeng a ti panagkurang ti suplay ti ikan ti masolbar daytoy I.S.D.A. no di pay ti parikut ti malnutrision ken livelihood dagiti umili.

(Adda tuloyna)