Aglib-in, napaltogan

VIGAN CITY – Napaltogan ti maysa nga agkalib-in bayat ti pannanganda idi rabii ti Marso 17 iti Sitio Calungboyan, Barangay Bulala, ditoy siudad.

Naitaray da Eugenio Bermudez y Cabalo, 55, naasawaan ken residente iti Barangay Ag-agrao, Sta. Maria, Ilocos Sur ken Flevy Reotita y Gabo, 47, naasawaan ken residente met laeng iti nadakamat a barangay, para iti pannakaagas dagiti sugatda.

Naammuan iti inbestigasion dagiti polis a mangrabrabii dagiti biktima iti sanguanan ti balayda idi pinaltogan ida ti di nabigbig a tao a nagpuesto iti akinlaud a paset ti balayda a nakapuntaan ti makannawan a saka ni Eugenio ken ti kutit ni Flevy.

Nakarekobre dagiti inbestigador iti dua a deformed slugs a mapapati a nagtaud iti Gauge 12 iti nakapasamakan ti pammaltog.

Di pay ammo ti motibo ti pammaltog.#