Agmamanok, natiliw

STA. CRUZ, Ilocos Sur – Nagasat daytoy suspek ta saan a linalat dagiti agindeg iti Barangay Gabur Sur, ditoy nga ili kalpasan a natiliw a nagtakaw iti manok idi parbangon ti Hulio 28.

Nadanon dagiti polis ken opisial ti barangay ni Roger De Fiesta, Jr., 19, residente met laeng iti nadakamat a barangay, a nakatugaw iti abay ti bubon idinto a nalawlaw kadagiti tattao.

Iti panagimbestiga dagiti polis, nasiputan ni Frederick Dauz, 41, ni De Fiesta nga immuneg ti nipa hut a naipatakder iti paraanganda, nangtiliw iti manok ket tiniritirna ti tengnged daytoy sa dinagdagusna ti rimmuar iti inaladan.

Sinurot da Frederick ken ti kabsatna a ni Jeffrey ti suspek ket tinengngelda daytoy sada nagpatulong iti polis.

Addan ti suspek iti kustodia ti polis para iti umisu a disposision.#