Agmistrokanto pay?

Sarita ni Jobert M. Pacnis
(Maudi a paset)

“Yes, sir.”

“Bring your parents tomorrow, Kristofer,” kinuna manen ni sir. “I’d like to talk to them.”

“Yes, sir,” mapilpilit a sungbat ni Kristofer.

Ti laeng nanang ni Kristofer ti immay iti kabigatanna. Mabain kano ni tatangna iti aramid ni Kristofer.

Nagsasangokami iti opisina ni prinsipal. Kasta unay ti panag-sorry ni Manang Tess iti aramid ti anakna. Ngem ni Kristofer, saan man laeng a mamki. Nakamurareg lattan iti tugawna.

Pinagaramid ni sir iti promissory note ni Kristofer kas nakalanad iti SSG rules. No ulitennanto pay ti pa-nangbastos iti asino man a titserna, maipataw kenkuanan ti nadagdagsen a pannusa. Pinirmaanda nga agina daytoy.

Ket daytan ti nanipudan ti di panagun-uni ni Kristofer nupay duduakami nga agsabat iti pathway. Mayat ti sasaga-wisiwanna a kasla awan makitkitana. Ania, siak ti parukmaenna? Saan pay laeng!

Ngem no kasta nga agklaseak kadakuada, awagak nga ag-recite tapno dina kunaen a pinersonalko ti napa-samak. Ngem kasla ketdin naipigket iti tugawna. Ken nadait dagiti bibigna!

Insapasapko ti namagbaga kadakuada ta nganngani aminda, di pulos sumungbat kadagiti saludsodko. Kasda la nagtutulag nga ipabukodda amin kaniak ti panagsao iti klase. A di mabalin! Masapul a learner-centered ti maysa a klase. Saan a kasla idi un-unana a techer-centered!

Ngem kasla awan mang-mangngegda. Agduduma ti turong ti imatangda. Adda mangbuybuya kadagiti mada-ma nga agpi-PE iti playground. Adda kasla masmasdaaw iti panagbettak ti dalluyon a nalawag a makitada iti maka-nigidda. Adda kasla agbil-bilang iti alutiit nga al-aldaw. Adda agar-aramid iti lima gasut.

Ungtak koma ida ngem isu pay a pagaduan ti mangrugin nga aguban a naingpis a buokko. Apagsurok a tallo a katukkol pay laeng ti edadko. Ngem sabagay, naubing ni nanang a naguban.

No kasta a break wenno nalpasen ti klase, adda dagiti babbai nga estudiantek nga agdisnudo a mangpagut kano kadagiti managsaggaysa nga ubanko.

“Saanyon a problemaen dayta,” kunaek met kada-kuada.

“Ngem kasla naglakayka unay no kuan, sir,” ipallilitda.

“Inurayko dagita iti nasurok a tallopulo a tawen, sa ita, ipaikkatko? No way!” isung-batko. A pagkakatawaanda.

Ngem no madlawko nga umadu, ipapagutko met laeng ken ni baket no kasta a yumanko ti mapaspasamak iti pagadalan.

“Agmistrokanto pay?” sangkakuna met ni baket. “No dimto met kayat nga ipakat ita ‘ta kinainhinierom!”

Wen, lisensiadoak nga inhiniero ngem saankon a nausar pay ta isu daydi panagsakitko iti pannakaalak koma iti maysa a kompania ti telekommunikasion. Gapu iti napalusposak a gundaway, inkeddengko ti mangala iti unit-ko iti Edukasion kalpasan a napasublik ti salun-atko.

Isu nga addaak ita nga agsaksakit ti ulona nga agisuro. Ngem ayatek met latta ti agisuro!

Apay kano a diak agabrod? Nagdakkel kano ti potensialko nga agakup iti kuarta sadiay.

“Kayatko a tarabayen ti pamiliak,” kunak latta no kuan.

KALPASAN ti naudi a period iti malem, nagdiretsuak ti gardenko. Nagpagutak kadagiti nagtubo a ruot. Inurnongko iti suli ta ikalikto dagitoy iti nagbaetan ti dua kadisso a mulak a tabungaw.

Narusepakon iti ling-et idi sumungad ni Kristofer a nakabitbit iti dua a baldi ti danum. Inatapko a sibuganna ti mulada iti garden-da a kaabay ti nagmulaak. Naimbag man ta ammona ti agsibug, kinunak iti nakemko. Sang-kareklamo ti adbayserna ti kinasadutna iti room-da.

“Good afternoon, sir,” inkablaawna.

Milagro! “Kasta met,” insungbatko. “Dadakkelen dagita mulayo nga okra…”
dagita mulayo nga okra…”

“Wen ngarud, sir. Makaay-ayo a kitkitaen.”

“Ad-adda manen a bumaludbodda ita ta sibugam ida.”

“Dagiti kakaduak ti agsibug ita, sir. Dagiti met mulayo ti sibugak.”

“Agpayso?” nasdaawak.
“Wen, sir. Makitkitak ngamin a dakdakayo a mangas-asikaso kadagiti mulayo. Isu a napanunotko a tulongankayo.”

“Nagsayaaten, balong…”

“Sorry, sir, iti naaramidko iti kallabes…”

Kasla diak mamati iti ma-paspasamak. “Awan kaniak daydiayen. Saanmo a pagda-nagan,” inisemak.

“Agyamanak, sir.” Ket rinugiannan ti agsibog.

“Agyamanak met itoy nga itutulongmo.”

“Siakon ti kanayon nga agsibog, sir, a?”

“Wen, a, balong…”

Kasla agtatapawak iti panagturongko iti office idi malpasak iti garden. Diak pay laeng patien ti impakita ni Kristofer. Ngem napayama-nak ketdi. Mariknak ti kina-seriosona
kadagiti insa-wangna.

Ad-addan ti marikriknak a ragsak idi makalas-udak iti old site. Dagiti masetas iti SSG park, sibsibugan dagiti uppat a nangtudoktudok iti bunga ti papaya idi! Daytoy pay ti maysa nga area a kanayonko a sibugan ta maliplipatan met dagiti SSG officers no dadduma.

“Nagsayaaten, babba-longko,” kinunak kadakuada.

“Sikamin a kanayon ti agsibog, sir,” kinunada. “Sinibuganmi payen ‘diay papaya,” intudoda ti nar-guoyan iti bungana a papaya iti suli. “Nagdadakkeldan, sir!”

“Wen ngarud. Ta kanentayto no maluomda!”

“Yes!” inriawda. “Thank you, sir! Imulaminto iti bal-balaymi dagiti bukel!”

Nakalaglag-an iti panagrik-nak ti insakbatko a bagko a napno kadagiti libro idi aga-widakon.#