Agmistrokanto Pay?

Sarita ni Jobert M. Pacnis
(Umuna a paset)

APAGSARDENGKO kadayta nga agsapa, ti nangisit a Wave 100-ko iti sirok ti lugo iti sango ti office ti Cabaybay West National High School a pagisuruak idi sabtennak ni Mae nga adalak iti Math iti Grade 7.

“Sir, ni Kristal, nagpunaw!” ti kaklaseda ti kayatna a sawen.

Tinurongko a dagus ti kuartoda. Ar-aribungbonganda ni Kristal a nakamudumod ti rupana iti armchair ti tugawna. Pinaadayok ida sa nangbaonak iti lalaki a kaklaseda a mangala iti maysa nga electric fan iti office ta uray agsapa pay laeng, nakabarbaran ti pul-oy. Adda met ketdi dua a ceiling fan-da ngem ‘tay met naglalaka a no ar-arigen, saanda pay a mapug-awan dagiti lamok. Kasano, taginginaen dagiti nagannak ‘tay branded. Saanda kano a kabaelan ti ag-contribution. Ngem adda met itayada iti hueteng!

Pinatangadko ni Kristal. Pinaangotak iti sangkaitugotko a rub naimbag la a pangpabang-ar iti bagbagi aglalo no kasta nga agtrabahoak iti garden. Wen, adda bukodko a garden iti dati a pagbasuraan iti likud ti daan a CR iti new site.

Nagkadua daytoy pagadalanmi. Adda iti lauden ti old site, agarup 50 metro, ti new site. Ditoy ti yan dagiti Grade 8 agingga iti Grade 10. Awan TLE class-ko ngem innalak ti paset a di nasakup dagiti horticulture students a mulaan. Idi Hunio a katikagna, pinasuyotak daytoy iti pagpatay ti ruot ta nakapuspuskol dagiti kuantong, pagetpet, kamkamotit kadayta a disso. Ita, nakalanglangton dagiti bilunak, kamotit, ken karabasa nga immulak. Nakapaminduaak payen a nanguggot kadagiti bilunak.

“Nammigatka?” dinamagko ken ni Kristal idi yangadnan ti rupana.

“Saan, sir…” arig di simngaw ti timekna. Aglalanay dagiti matana.

Kunakon ket! Saanen a karkardayo ti kastoy a kaso ditoy pagadalanmi. Gapu iti kaadayo ti paggapuan dagiti dadduma nga adalanmi—ta agballasiwda pay iti karayan—saandan a mammigat ta naladaw kano met nga agluto dagiti nagannak kadakuada. Numona ta no nakabiahen dagiti dua a bilog a mangiballasiw kadakuada agingga iti pagurayan ti traysikel, awanen ti mapaglugananda. Kapilitan a manglanganda iti klase.

Tunggal meeting, PTA meeting wenno card day, kanayon ketdi nga ipalagipmi kadagiti nagannak a dida koma ipalubos a di mammigat dagiti annakda sakbay a sumrekda iti agsapa. Ngem addada met latta agpunaw iti bisinda!

Rason dagiti inna, maladawda nga aglutluto ta yur-urayda pay laeng dagiti assawada a napan nagkalap iti karayan wenno iti baybay. Dagitinto kano pay laeng isangpetda ti lutuenda a pangaldaw (ta kadawyan a kape lattan iti agsapa).

Nagpaalaak iti itlog ken instant noodles iti kantina iti ruar ti pagadalan. Pinalutok iti TLE room naimbag la nga ipauneg ni Kristal. Napanak metten iti office ta diak pay gayam naiplastar dagiti ramramitko.

Apagdissok ti bagko idi aguni ti buzzer. Dinarasko nga inruar iti kabinet a bassit iti masikigak dagiti extension, microphone, amplifier ken connector, ken ti trumpa a masapul iti linia para iti ehersisioda a Taichi. Iduldulinko dagitoy ta no adda laeng iti rabaw ti kabinet wenno lamisaan, wenno iti maysa a kuarto, sigurado nga addanton kurangna, wenno dadaelna, inton makitam. Dida ammo nga ipateg dagiti ramit ti pagadalan. Pagraranggasanda.

Maysa pay a pakasuronak ket no buloden, wenno ipaala kunak man laengen ta ubbing met ti baonenda, dagiti kakaduak no kasta nga usarenda iti klaseda. Aglalo ti LCD TV. Saanda nga iyawat kaniak dagiti extension, HDMI connector, remote ken ti telebision. Paitulodda lattan kadagiti ubbing ket ibattal lattan dagitoy iti lamisaan iti library aglalo no adda klasek. No adda dagiti ag-library, saan a dida “kalikuten.”

Inton masapulda manen iti sumuno nga aldaw, siakto met laeng ti pagdiretsuanda. No kasta a masuronak, awan met ti naisubsubli kaniak idi kalman, kunaek. Ngem kinapudnona, naidulinkon dagitoy iti kabinet no kasta a maranaak la ketdi a nakawara. Irantak nga idulin ti remote no dadduma a mapunnuanakon.

Ditanto pay laeng a maalay-ayan ti riknak no tumanabutobda a dida nausar ti insaganada a power point presentation.

Inngatok pay nga immuna ti circuit board, iti likudan ti ridaw ti office tapno adda kuriente iti new site a pagliliniaan dagiti ubbing, sakbay a rimmuarak. Nangpayapayak iti dua a lallaki nga estudiante. Pinabagkatko ti sound system.

Nakalinian dagiti Grade 7 a nadanonak iti new site. Ngem managsaggaysa pay laeng dagiti Grade 8 agingga iti Grade 10. Makumikom dagiti SSG officers a mangbugbugtak kadakuada idinto nga ur-urnosen dagiti dadduma ti linia. Napangayemngemak. Awan a talaga ti pagnaan ti pammagbaga kadakuada. Kanayon a maipalagip a no mangngegdan ti pannakapatit ti kampana, agliniadan a dagus tapno saanda unay a maibilag. Ken saan koma metten nga ibaga a kanayon ti panagurnosda a dagus saan ket a dayta a pagbalinenda a lugar a pagtsitsismisan ti liniada. Kimmaro ti kinalaingda nga agiistoria, iti pammaliiwko, idi timpuar dayta al-aldab ken paspastilias iti telebision!

Dinarasko nga in-setup ti sound system. Inawagak dagiti kasla awan latta ti bibiangda iti mapaspasamak ta itultuloyda latta ti agdalus iti area-da (a nagbassit). Nakaladladawdanto met ngamin a sumangpet. Isu pay laeng ti panagdardarasda a napan iti kuartoda tapno isublida dagiti iggemda a sagad, pagakup, ken timba. Ngem makatuok ti iruruarda. Kapilitan nga inawagak manen ida.

Ta dagiti manen pagpapintasda ti sinangoda! Ken ania pay no di dayta kalkalyeserye a nakaadikanda!

(Adda tuloyna)