Agmulmula iti mais, masuruan nga agaramid iti feeds

VIGAN CITY – Maangay ti maysa a training para kadagiti agmulmula iti mais tapno masuruanda nga agaramid iti feeds, segun iti provincial corn coordinator itay nabiit.

Kinuna ni Provincial Corn Coordinator Oscar Tobia a maangay ti training ti corn livestock integrated farming system tapno  maadalan dagiti agmulmula iti mais iti panagaramid iti feeds a pamataudanda iti kanayon a pamastrekanda.

Segun  ken ni Tobia, babaen ti nasao a training, masursuruan dagiti agmulmula iti mais nga agaramid iti feeds a pagpakanda kadagiti dingnguenda a kas iti baboy, kalding, baka.

Kinuna ni Tobia a saan koma nga ilako dagiti agmulmula iti produktoda a mais iti Bulacan a kas grain no di ket ilakoda a kas “karne” idinto nga inlawlawagna a gilingendan ti produktoda a mais ket aramidenda a feed tapno imbes a daydiay maganansia dagiti traders iti daydiay a bukel ket sumrek laengen kadagiti agtartaraken iti dingnguen.

Impalgak ni Tobias a mapattapatta a P300 ti maganansia ti mannalon iti kada sako a mais no isun a mismo ti agaramid iti feeds ket dakkelen daytoyen a mainayon iti ganansiana a kas corn grower.#