Agmulmula iti strawberry, nakasaganan nga agbalin nga entrepreneur: mayor

LA TRINIDAD, Benguet – Kinuna ti mayor ditoy a nakasaganan dagiti agmulmula iti strawberry iti ilina nga agbalin nga entrepreneurs iti yaadu dagiti produkto nga aramidenda manipud iti mulada nga strawberry.

Kinuna ni Mayor Artemio Galwan a malaksid kadagiti agdama a produktoda nga strawberry jams ken strawberry cakes, nakasaganan nga agaramid dagiti agmulmula kadagiti dadduma pay a by-products ti strawberry kas iti sabon, losion, body scrub, lip gloss ken feminine wash  tapno lumawlawa ti paglakuanda.

Dagitoy a by-products ti strawberry dagiti intandudo daytoy nga ili iti panangisayangkatda iti Strawberry Festival a nangrugi itay Marso 14 ken agpatingga iti Marso 28.

Kinuna ni Galwan a namnamaenda a babaen ti strawberry festival, dakkel ti matgedan dagiti lokal nga agmulmula. Nawadwad ti naglakuan dagiti mannalon iti apitda nga strawberry jam ken strawberry cakes iti kalkalpas a Panagbenga Festival nga inangay ti Baguio City itay napalabas a bulan.

Segun iti maysa nga agparpartuat iti strawberry jams ken cakes, nakalako iti 500 bayat ti nasao a festival.

Kabayatanna, kinuna ni Felicitas Ticbaen, municipal agriculturist, a dumakdakkel ti market dagiti presko nga strawberry ken dagiti by-products daytoy ket nagbalinen nga industria a pamastrekan ti ilida iti P50 milion iti tinawen.

Nasurok a 74 ektaria ti mamulmulaan iti strawberry ditoy nga ili a pangap-apitan dagiti mannalon iti 14 metric tons tunggal ektaria.#