Agmulmula iti tabako, naikkan PhilHealth insurance

SAN JUAN, Ilocos Sur – Nangilatang ti gobierno munisipal ditoy iti pondo para iti PhilHealth program a pakabenepisiaran dagiti agmulmula iti tabako.

Pinasurbeyen ni Mayor Bernard Sarmiento dagiti amin a mannalon ditoy nga ili nga awanan pay laeng iti PhilHealth cards tapno mairamanda iti listaan a mabenepisiaran iti babaen ti PhilHealth program.

Adda inlatang ti gobierno munisipal ditoy a P120,000 para iti nasao a programa. Nagtaud ti pondo manipud iti bingay daytoy nga ili iti excise tax ti tabako.

Manamnama a maikkan amin dagiti mannalon iti PhilHealth cards agsipud ta adun kadakuada ti agsagsagrapen iti benepisio ti PhilHealth.

Adda tripartite agreement ti gobierno munisipal, provincial government ken ti congressional district mainaig iti pannakaiwaras dagiti PhilHealth cards kadagiti marigrigat nga agnaed iti probinsia.#