Footer

AGO BENDITO (Maikadua a paset)

Sarita ni JOBERT M. PACNIS

 

Saan lattan a nagun-uni ni Intong. Impamaysana ti nagmaneho.

Nupay masimron ta kasla nagmalas man ta baket ti immuna a nakaabayna ita a bigat, naragsakan met laeng idi yawat daytoy ti bioleta ken paarasaas a nagkuna iti kip da tseyns.

Saan met a nayanak idi kalman. Ammona nga adda panaggusto ni Nana Inyang kenkuana. Kanayon nga isu ti biroken daytoy iti turnuan. Arkila pay ti pagtirana.

Agpapakiut kenkuana ti baket, wen, madlawna unay. Ngem kuidaw ta awan man la ti tumakder a muldotna itoy.

Aniaak… agbabaket? Bay-amon! kunkunana iti bagina. Dina la kayat ti makantiawan iti agbabaket. Di pay ket isunto ti pangpangngegan dagiti padana a drayber a de-sound ti traysikelna iti kanta nga Agbabaket? ‘Minsanton!

Sumipngeten idi makasangpet iti balayda. Adda nangarkila kenkuana a komersiante ti ikan ket napanda nagisursor iti kabangibang nga ili. Dakkel bassit ita ti sapulna.

Gagasatna ni Nana Inyang? Hell! dina kayat a panunoten.

Ad-adda a kayatna a panunoten a sagut ti Dios ti gasatna ita. Ala, nasayaat met no kasta tapno makaurnong a dagus.

Karabianna, nalpay ti abaga ni Itong idi pasiarenna ni Ailene. Nakauna manen kenkuana ni Mang Dexter. Addan daytoy a nadarimusmosanna iti sango ti tianggi da Ailene. Sumanao. Paglastognan sa pay ti N95 a selponna ta isu lattan ti sangkaiggemna.

Saanen a nagtuloy. Awanto met la ti serserbina ta dinto met la pabagien ti lakay. Bangkaanna la ketdi ni Ailene!

Ayna, no siak ti mapaguram, Mang Dexter, ipulongko ken ni baketmo ti kinaarmendom! sangkakunana iti nakemna.

“APAY, dimo pay mapanunot ti mangasawa, Barok?” naklaat kadayta a saludsod ti amana  iti dayta a pangrabii.

“Ne, apayen, ‘Tang?” inamadna.

“Dikan nga ubing. Addaankan iti husto nga edad ket rumbeng laeng nga agsimpaka koma metten. Mailiwkami metten iti apo.”

“Bay-am ta sumapulak ngaruden iti agbalin a manugangyo, ‘Tang,” kinunana. Sa wakas, inrag-o ti unegna, dagiti payen nagannak kenkuana ti mangdagdag nga agsimpan. Kinapudnona, dinan maanusan ti panangsursurdo kenkuana dagiti barkadana.

“Ania, Itong, banglesem sa met ti balakmon?”

“Wenno dina ammo ti agtaraok ta upa?”

“Kamanokan ngarud, a! Ha-ha-ha!”

Ken adu pay. Naimbag ketdi ta nawayway ti kurdonna. No saan laeng, baka ketdi addan nadisnogna kadagiti barkadana.

Ad-adda itan nga igaedna a pagtinnagen ni Ailene ta agragut la unayen dagiti dadakkelna a maaddaan iti apo.

Ngem anian ta kasla man nadayyeg ti lubongna iti kabigatanna ta nadamagna laengen a nakitaray ni Ailene iti textmate-na. Dina matukod a panunoten a ti babai nga inar-arapaapna nga agbalinto nga ina dagiti annakna, maysa laengen nga arapaap.

Naginum iti kamalmanna. Agtayyeken ti lubongna idi mapanunotna ti agawid. Agiwes-iwes ti traysikelna a nangunor iti haywey. Pagpiaanna ta awan unay ti masabatna.

Idi sumreken iti kanto nga agtunged iti purokda, namimpinsan a dinan naiturong ti manibela. Kanakraad ti naudi a nangngegna.

NAKASAKSAKIT ti sibubukel a bagbagi ni Itong a nariinganna. Puraw amin a makitana idi ipalawlawna ti panagkitana.

“Yaman pay, Apo, ta nakariingen ti anakmi,” timek ni Nana Ibiang nga agluluasit iti abayna.

Agdamag koma no ania ti napasamak ngem kasla ‘tay simmiplot nga eksena iti pelikula ti pannakalagipna.

Tallo nga aldaw pay ti napalabas sakbay a pinalubosan ti doktor a rimmuar. Napalalo a yamanna ta awan ti naparpar wenno natukkol a paset ti bagina.

Ngem dina maawatan ti bagina. Kasla mayang-angin. Agsisimparat ti adda iti panunotna. Ti baro a biag a naited kenkuana. Ti saem nga impalay ni Ailene iti pusona. Ken no ania la ditan. Naglaka a maapektaran ti panunotna. Saanen a kas idi a kaykayatna ti makikakaarruba. Naynay nga agmaymaysa iti indayon. No mabalin, dina kayat ti masinga. Ket no makalagip, mapan iti baybay agpagnapagna.

Agdandanag la ket ngarud da Tata Sabas ken Nana Ibiang. Atapenda payen a nadaraan ti utekna. Ngem limpio met ti sungbatna no kasaoda.

MAGMAGNA iti aplaya ni Itong kadayta nga agsapa. Tagipintasenna man la unay ti buya ti nakaparsuaan. Ita man pay a maapresiarna dagitoy.

Ngem pagammuan ta sinabuagan ti nagdadakkel a dalluyon. Tsunami! nangngegna a naipukkaw.

Nadaleb. Lumned-tumpawen. Dina matukod ti kadalem ti danum. Malmesen.

Imkis a nagpaarayat. Maysa nga ima ti naitanggaya kenkuana. Pinetpetanna a nalaing.

“Iggamannak, Anak. Umayka… ta adda paaramidko kenka,” timek ti nangalaw kenkuana. Ngem dina met makita ti rupana.

(Adda tuloyna)