Agpailayon a barangay kagawad, napapatay iti paggasolinaan

CALASIAO, Pangasinan – Napapatay ti maysa a pailayon a barangay kagawad bayat ti pananggasolinana iti motorsiklona idi malem ti Oktubre 17 ditoy nga ili.

Natay a sigida ni Gerry Garcia, 55, residente iti Barangay San Vicente ditoy nga ili gapu kadagiti sugatna iti bukotna.

Kitkitaen dagiti polis no adda pakainaigan iti eleksion ti pannakapapatay ni Garcia. Agpailayon ti biktima a barangay kagawad iti masungad a barangay ken SK elections a maangay inton Oktubre 25.

Ngem kinuna ni Provincial Director Rosueto Ricaforte a saanda pay a maibaga nga adda pakainaigan iti politika ti pammapatay agingga iti saanda a maipasdek ti motibo.

Segun iti inisial nga inbestigasion dagiti polis, makarkargaan ti motorsiklo ni Garcia iti paggasolinaan idi inasitgan ti dua a suspek a naglugan iti motorsiklo ket pinaltogan ti maysa ti biktima iti naminpat a daras.

Awan ti narekobre dagiti polis a kapsula iti nakapasamakan ti krimen. Mapapati a revolver ti inaramat dagiti suspek.

Iti pannakaisurat daytoy, awan pay ti nabigbig a suspek nupay nairekord iti CCTV ti gasolinaan ti pannakapapatay ti biktima.

Iti panangrebio dagiti inbestigador iti nasao a kamera, nakita a sinurot dagiti suspek ti biktima iti gasolinaan.

Daytoy ti maikapat a pammapatay iti maysa a kandidato para iti barangay ditoy manipud iti nangrugi ti panagkampania.#

Enhanced by Zemanta