Komentario: Agpapada a pannakaipakat dagiti paglintegan iti lockdown — Tawid News Magazine - Weekly Ilocos News 📰

Agpapada a pannakaipakat dagiti paglintegan iti lockdown

OPISIAL man wenno kadawyan nga umili no naglabsing iti linteg ket rumbeng nga agsungbat ta masapul iti padapada a pannakaipakat kadagiti pagannurotan iti implementasion ti enhanced community quarantine wenno lockdown iti nagduduma a lugar iti pagilian.

Nagpataud iti nabara a kontrobersia ti pannakarambak ti maika-55 a panagkasangay ni National Capital Region Police Office Director Major General Debold Sinas idi Mayo 8, 2020 sadiay Camp Bagong Diwa, Bicutan, Taguig City ta maibasar kadagiti ladawan a nai-post iti public information Facebook page ti NCRPO a nakipulapol ti Heneral kadagiti agarup-50 a police personnel iti NCRPO. Nakita iti ladawan ti pannakaipaay iti cake, rose ken pannakipulapol ni Gen. Sinas kadagiti bisitana iti nagduduma a lamisaan nga adda pay naidasar a maingel a mainum.

No dagiti nai-post a ladawan ti pagbasaran ket mapapati a nalabsing dagiti naipaulog a pagannurotan kabayatan ti lockdown a naipalaon iti “Bayanihan to Heal as One Act” kas ti pannakaipawil iti mass gathering, panagaruat iti facemask ken pannakaipakat ti social distancing iti panagpupulapol tapno malapdan ti pannakaiwaras ti Coronavirus Disease 2019.

Nagkiddawen ti dispensar ni Gen. Sinas iti negatibo a pinarnuay ti panagkasangayna. Inlawlawagna a kellaat ken saanna a ninamnama ti panagrambak nga insagut kenkuana dagiti pasurotna a simple a “mañanita” a nabayagen a tradision dagiti agturpos iti Philippine Military Academy a panangkablaawda kadagiti agkasangayda a commander wenno hepeda. Impalgakna a nasurot ti social distancing kabayatan ti pasken, ken dagiti dadduma a ladawan a nai-post iti Facebook ket “edited” ken daanen dagiti dadduma ket saanna nga ipakita ti naan-anay a napasamak kabayatan ti insidente.  

No man pay napunasen dagiti ladawan a nai-post iti public information page ti NCRPO a nangipakita iti panagrambak ti panagkasangay ni Gen. Sinas ket napatauden dagiti kontrobersia a nakaigapuan dagiti panagimbestigar dagiti maseknan nga ahensia a posible a mangiturong iti pannakayuli iti kaso gapu iti panaglabsing kadagiti pagannurotan kabayatan ti pannakaipakat ti lockdown.

Paset pay ti panagrambak ni Gen. Sinas iti panagkasangayna ti panagiwarasda kaduana dagiti NCRPO personnel iti relief goods kadagiti 6,000 a marigrigat kadagiti nagduduma a lugar dagiti napanglaw iti Metro Manila – idiay Tondo, Manila; Culiat, Quezon City ken Maharlika Village, Taguig City. Naalaan pay iti video footage a naipabuya iti telebision ti panagiwaras iti relief goods a nakalabsingan iti social distancing.  

 Immandaren ni Philippine National Police Chief General Archie Gamboa iti PNP Internal Affairs Service iti panagimbestigar iti kaso ni Gen. Sinas. Binilin metten ni Justice Secretary Manardo Guevarra ti National Bureau of Investigation para iti naan-anay a panagimbestigar iti kaso ni Gen. Sinas ket no naglabsing iti linteg ket mapilaan isuna iti tumutop a kaso.

Nakiddaw metten ti Department of Interior and Local Government iti clearance iti Malacañang iti posible a pannakayuli iti kaso kontra ken ni Gen. Sinas ta kasapulan daytoy no ti maidarum ket Presidential Appointee.

Nagpataud kadagiti nagduduma a negatibo a reaksion ti panagrambak ti panagkasangay ni Gen. Sinas ta rebbeng a saanna koma nga impalubos a napasamak dayta “out of delicadeza” kas heneral ken director ti NCRPO a kaaduan ti personnel ti PNP regional office, ken sakupna ti National Capital Region a sentro ti panagraira ti COVID 19 iti Pilipinas.

Napateg unay ti akem ti PNP iti pannakaipakat ti lockdown kas maysa kadagiti frontliners. Saan a magatadan ti sakripisio dagiti frontliners ta sumangsangoda iti saan a makita ken napegaad a kabusor a pangta iti biagda no maakaranda iti COVID 19 ket nasken ti naan-anay a panagannadda. Addan dagiti nasurok a 160 a polis a nai-report a nagpositibo iti daytoy a virus, ken addan naipadamag a lima a natay, ken lumalaingen dagiti dadduma a naakaran.  

Nakalkaldaang nga insidente ta kabayatan ti pannakaipakat iti lockdown iti Metro Manila ken dadduma pay a lugar iti Pilipinas ket dagiti polis ti natudingan a mangipakat iti linteg ken kangrunaan nga agmando kadagiti checkpoints ken mangsitar kadagiti aglabsing. Nagadu dagiti insidente a nakairamanan dagiti kameng ti PNP kabayatan ti lockdown iti Metro Manila a nangsitaran dagiti polis kadagiti aganaed iti las-ud ti condominium idiay San Juan City gapu iti social distancing, iti pribado a subdibision sadiay Makati City gapu iti saan a panagaruat iti facemask, ken ti pannakapapatay ti maysa a retirado nga Army Marawi Siege veteran a nasitar iti checkpoint sadiay Quezon City.  

Nagkas-ang ta saan a napanunot dagiti opisial iti NCRPO a nakikaysa iti pasken a dagiti inaramidda ket mailabsing iti linteg nga ipatpatungpalda. Saanda a napanunot a kabayatan iti lockdown ket nagadu a tattao dagiti saan a nakapagrambak kadagiti napateg a pasken iti panagbiagda kas dagiti saan a natuloy a graduation ceremonies, kasar ken buniag. Nagadu dagiti pamilia a nagminatay gapu iti sakit iti saandan a nakita a pulos dagiti minatayda gapu ta naideretsodan manipud ospital a na-cremate. Dagitoy a pagallagadan ket tinungpal dagiti ordinario a tattao a mangipakita iti panagtudioda kadagiti pagallagadan para iti sapasap a pagimbagan. Ngem nagkas-ang ta adda dagiti napasamak nga insidente a panaglabsing dagiti pannakabagi iti linteg ken sipapanakkelda pay a nai-post iti social media a kasla pagpasindayagda nga “exempted-da” iti pannakaipakat ti linteg.      

Para kadagiti dadduma nga umili, mabalin a nalag-an laeng ti panaglabsing a napasamak kabayatan ti panagkasangay ni Gen. Sinas ta awan met ti pannakainaigna iti moralidad wenno kurapsion. Ngem saan a nasayaat dayta nga insidente a pagtuladan kabayatan a ti pagilian ket sumangsango iti krisis. Dakes a pagwadan no dagiti agipatpatungpal iti linteg ket isuda met ti aglablabsing kadagiti pagannurotan.    

No ni Presidente Rodrigo Duterte ket rinambakanna a pribado ken simple ti maika-75 a panagkasangayna sadiay Malacañang idi Marso 27, 2020 kabayatan ti maikadua a lawas ti lockdown, ket kasta met koma ti inaramid dagiti dadduma ken nababbaba nga opisial ti gobierno kas mangipaneknek ti panagtudioda kadagiti pagannurotan.

Ti pagturongan ken pannakaresolbar iti kaso iti panagkasangay ni Gen. Sinas ket pagrukodan no ti Malacañang ket awan ti pilpilienna iti pannakaipakat ti linteg – opisial man ti gobierno wenno kadawyan nga umili. ●

READ MORE