Footer

Agpapada a pannakaipakat ti ngipen ti linteg

MAIPAKAT ngata ti ngipen ti linteg kalpasan a sinentensiaan ti Sandiganbayan 5th Division ni sigud a First Lady ken agdama nga Ilocos Norte 2nd District Rep. Imelda Romualdez Marcos a nagbasol iti maminpito a bilang ti graft wenno panagkunniber ken panangusarna iti posisionna iti gabinete tapno makamantiner kadagiti accounts iti banko sadiay Switzerland kabayatan ti napaut a panagturay ti Pamilia Marcos iti Pilipinas?

Sigud a nagtakem ni Rep. Marcos kas Minister of Human Settlements, Miembro ti Interim Batasang Pambansa ken Gobernador ti Metro Manila Commission kabayatan ti panagturay daydi asawana a ni Presidente Ferdinand Marcos iti nasurok a 20 a tawen agingga idi 1986 a napadisida iti turay kabayatan ti umuna nga EDSA People Power Revolution.

Nagramut ti kaso ni Rep. Marcos iti darum nga impila idi 1991 ni sigud a Solicitor General Frank Chavez, a ti Pamilia Marcos ket indalanda dagiti innalada a pondo ti gobierno iti personal nga account sadiay ballasiw-taaw. Impakaammo iti media ni Assistant Special Prosecutor Ryan Rey Quilala a ti Pamilia Marcos ket nangbukel iti pito a Swiss foundations a nakaikargaan dagiti depositoda a kuarta, kalpasanna, iserrada ti nangalaanda sada iyakar ti deposito iti sabali a foundation ken account.  Impalgakna a ti gatad ti naideposito ket dumanon iti $200 Million.

Nasentensiaan ni Rep. Marcos a mabalud iti innem a tawen ken maysa a bulan agingga iti 11 a tawen iti tunggal maysa kadagiti pito a bilang ti graft. Madusa pay iti agnanayon a pannakaipawil a panagserbina iti gobierno. Awan isuna ken ti abogadona iti Sandiganbayan kabayatan ti pannakayetnag ken panangibasa ti Clerk of Court ti sentensiana. Naikkan ti Kongresista iti 30 nga aldaw a mangipalawag ti gapu iti kaawanda iti korte kabayatan ti promulgasion ti desision ti kasona. Manamnama ti panagapila ni Rep. Marcos iti Korte Suprema tapno mabaliktad ti panggeddeng ti Sandiganbayan, ken maabsuelto isuna.

Iti pannakasentensia ti sigud a First Lady, ibilang dagiti biktima ti human rights violations, ken dagiti kameng ti oposision idi panawen ti panagturay ti Pamilia Marcos, a nagun-odda ti hustisia no man pay kalpasan ti adu a tawen; ket dayta ti mangipaneknek ti kinapudno dagiti akusasion iti adu nga illgotten wealth, ken graft and corruption kontra ti sigud a First Family a nabayagen a pagliblibakanda.

Inrakurak ni Presidential Spokesman Salvador Panelo a ti Malacanang ket respetarenda ti pangngeddeng ti Sandiganbayan iti kaso ni Rep. Marcos. Impalgak iti media idi pay 2017 ni Presidente Rodrigo Duterte iti tarigagay ti Pamilia Marcos a mangisubli ti paset dagiti maipabpabasol kadakuada nga illgotten wealth agraman dagiti dadduma a gold bars.

Segun iti Philippine Commission on Good Government ti Pamilia Marcos ket mapapati nga addaan iti mapattapatta nga illgotten wealth nga aggatad iti US$5 billion – US$10 billion, a naideposito ken nakadulin iti ballasiw-taaw. Nakarekobren ti gobierno iti agarup P170 billion iti las-ud ti 30 a tawen.

Impakaammo ni Human Rights Lawyer Neri Colmenarez a no man nasentensiaanen ni Rep. Marcos ket saanna a namnamaen a mabalud ti 89 ti tawenna a kongresista gapu iti kaadda ti pamiliada iti turay ken kinabaknangda ket kabaelanda ti mangala kadagiti nalalaing nga abogado iti panagapilada agingga iti Korte Suprema tapno maabsuelto ti kasoda. Inlawlawagna nga iti proseso ti panagtaray ti hustisia iti Pilipinas ket naginad unay a mabalin nga awanton dagiti agdarum ket akusado ket saan pay a nagbanag ti kaso. Mabalin nga ikkanto pay ti Duterte administration iti parol wenno Executive clemency.

Impakaammo met ni sigud a Commission on Human Rights Chairperson Etta Rosales a mangipila iti kaso tapno ma-disqualify ni Rep. Marcos iti panagkandidatona a Gobernador iti Ilocos Norte. Addan iti maudi a termino ni Rep. Marcos kas kongresista, ken nagipila iti kandidaturana a para gobernador ti Ilocos Norte.

Inrakurak met ni Commission on Elections Spokesperson James Jimenez a saan a mabalin a ma-disqualify ti kandidatura ni Rep. Marcos gapu ta awan pay ti “final judgement” nga inyetnag ti Korte Suprema, ngem no mangabakto iti May 13, 2019 National/Local Elections, mabalin ti mangipila iti quo warranto petition tapno maikkat iti posisionna.

Immandaren ni 5th Division Chairman Associate Justice Rafael Lagos ti pannakayetnag ti warrant of arrest ni Rep. Marcos, ngem linawlawagan ti Ombudsman kas lead prosecutor, ken 5th Division, a gapu ta ti kaso a graft ket mapiensaan, mabalin ni Rep. Marcos ti agpiensa para ti temporario a wayawayana kabayatan ti panagapilana iti kasona.

Impalgaken ni Philippine National Police Chief Director General a madadaanda a mangaresto kenkuana no addan warrant of arrest nga iyetnag ti Korte. Sumagmamanon nga aldaw kalpasan nga inyetnag ti Sandiganbayan ti pangngeddeng ngem awan ti sigud a mandar a maarestar ti sigud a First Lady. Naglak-am ti kritisismo ti gobierno ta no dagiti napanglaw ken awanan-gaway ti masentensiaan ket sigud a maideretsoda iti pagbaludan, ngem no dagiti naturay ken nabaknang ti makedngan ket maitantan ti pannakabaludda.

Iti tawen ni Rep. Marcos nga 89, mabalinen nga agapila isuna iti humanitarian consideration tapno saanen a mabalud, ngem mabalin a saanna a dawaten dayta gapu ta saanna nga aklonen dagiti kaso a nakaidarumanna. Agapila la ketdi iti nangatngato a korte tapno maabsuelto iti kasoa.

Saanto man a mabalud ni Rep. Marcos, umanayen a konsolasion dagiti nangiruprupir iti pannakaipakat ti linteg kontra iti pamiliada, a nasentensiaan gapu ta napaneknekan ti Sandiganbayan a pudno dagiti naipabasol kadakuada a panangpabaknangda iti pamiliada iti wagas a maikanniwas kabayatan ti panagturayda. Ipaneknek dayta a saan a mayanatup ti kellaat a pannakaitabon ti asawana iti Libingan ng mga Bayani.

No agapila ni Rep. Marcos iti Korte Suprema ket maabsueltonto kadagiti kaso a nakasentensiaanna. Daytanto ti mangipaneknek a bangking ti pannakaipakat ti hustisia. Nabayagen nga isyu dagiti akusasion iti adu nga illgotten wealth ti Pamilia Marcos a nakadeposito kadagiti banko iti Switzerland, ngem saan a pulos nga inaklon dagiti kameng ti pamilia ti pammabasol kadakuada.

Ti isyu ti illgotten wealth ket biningayna ti pammati ken kapanunotan dagiti adu nga umili iti wagas ti panagserbi dagiti Pamilia Marcos idi adda pay iti turay ti sigud a Presidente. No man pay napadisida ken nagpaingda sadiay Hawaii iti nagbayag, ket iti panagsublida iti Pilipinas, in-inut ti panagsubli dagiti kameng ti Pamilia Marcos iti rienda ti turay.  Kalaksidan ken ni Rep. Marcos, Gobernador ti Ilocos Norte ken kandidato a para senador ni Imee. Sigud met a gobernador ken senador ni Bongbong, ken madama ti protestana iti kina-Bise Presidente ken ni Vice President Leni Robredo a nangabak kenkuana idi napalabas a 2016 Presidential Elections. Dagiti dadduma pay a kameng ti Pamilia Marocs ket nabutosan ken agngayangay iti nagduduma a posision iti lokal a gobierno. Ipaneknek dayta nga iti laksid nga adu nga umili dagiti gumurgura iti Pamilia Marcos ket adu met latta dagiti mangay-ayat kadakuada. (Eden Alviar)

,