VIGAN CITY – Saan laeng a tinakawan ti dua a lalaki daytoy biktima no di linabusanda pay.
Nagreport ni Rowen Reboldela, 20, residente iti Tamurong, Caoayan, a dua a lalaki ti nanghold-ap kenkuana ket kinasakasda ti napasadaanna sada intaray dagiti aruatenna.
Segun iti palawag ti biktima iti polis, iti agarup alas dies ti rabii, inampara dagiti dua a lalaki iti asideg ti kamposanto iti nagbeddengan ti Caoayan ken daytoy a siudad ket nagpaitulodda iti sitio Nalasin, Barangay Camangaan ditoy a siudad.
Idi nakagtengda iti Nalasin, adda natangken a banag nga indugsol ti maysa nga inluganna iti bukotna sada inwaragawag ti pananghold-apda iti biktima.
Kinasakas dagiti di nailasin a suspetsa ti napasadaan ti biktima iti nagmalem nga agdagup iti P435.
Pinaglabus pay dagiti suspetsa ti biktima sada innala ti sapatos, pantalon, t-shirt agraman ti briefna.
Kinuna ti biktima a pattapattana nga agtayag iti 5’6” dagiti nanghold-ap kenkuana.#
