Agpaspasada iti Vigan, adu ti bastos, awanan disiplina: Tricycle summit report

VIGAN CITY- Iti baet ti kaadda dagiti paglintegan ken pagannurotan mainaig iti operasion ti motorized tricycle for hire ditoy siudad, adu nga agpaspasada ti sobra ti panagsingirda iti plete, bastos ken awanan disiplina, agpilida iti pasahero, ken pekpekenda ti luganda kadagiti pasahero, kangrunaanna dagiti estudiante, kaadda dagiti kolorum nga agpaspasada ken illegal a parkingan dagiti traysikelan.

Kinuna ni Konsehal Everin Molina, chairman ti committee on transportation, a kitkitaenna ti nasamsamay a sistema a pannakaidanon ti reklamo ti riding public kadagiti aglabsing a tricycle drivers ken “mamonitortayo a maaktuaran dagitoy a complaints”.

“Dawatentayo ti kooperasion ti amin ta padasentayo a pagtitinnulongan a solbaren dagitoy a problema,” kinuna ni Molina idinto nga innayonna a kasapulan ti community approach tapno maaktuaran dagiti reklamo dagiti pasahero.

Iti reportna iti session a naangay iti sangguniang panlungsod ditoy itay Setiembre 24, inrekomenda pay ni  Molina ti pannakaisagana dagiti porma a pagreklamoan dagiti pasahero nga itinnagda kadagiti drop boxes a maikabil iti nadumaduma a lugar iti siudad, pannakaipasdek ti complaint hotlines maikontra kadagiti aglabsing nga agpaspasada, istrikto a pannakaipakat dagiti ordinansa ken pannakaadal iti singasing a pannakapukaw dagiti saan nga autorisado a pagparkingan iti siudad.

Kanaig daytoy, kinuna ni Molina nga iriingna manen iti konseho ti pannakaaprobar ti pannakaited iti night time franchise kadagiti kolorum nga agpaspasada tapno agbalin a legal ti operasionda ken agbayadda met iti rebbengenda iti gobierno.

Kinuna ni Molina a no maikkan iti prangkisa dagiti kolorum nga agpaspasada, maikkan iti seguridad dagiti pasahero a maamitan iti rabii iti siudad iti panagawidda iti barangayda.

“Mapapigsa met ti aktibidad iti rabii ditoy siudad no adda madadaan a pagluganan dagiti tattao nga agawid iti barangayda,” kinuna ni Molina.

Innayon ti konsehal a saanna a maawatan no apay a kontraen dagiti operators ti pannakaited iti night time franchise kadagiti kolorum nga agpaspasada idinto nga iti rabii met laeng ti panagpasadada ket saanda met a mabalin ti agpasada iti aldaw.

“Kitaentayonto no adda nagbaliwan ti kondision ken situasion ket ammuentayo manen ti karirikna dagiti tricycle operators ken drivers,” kinuna ni Molina.#