Agri courses, mairugi a maiyadal iti ISCC

VIGAN CITY – Mangrugi iti sumaruno nga school year, maiyadalen iti Ilocos Sur Community College ti ladderized 4-year course nga Agriculture ken Animal Production.

Segun ken ni Vice Gov. Deogracias Victor Savellano, naipasan iti sangguniang panlalawigan ti resolusion a mainayon dagiti nadakamat a kurso kadagiti agdaman a kurso iti ISCC a tartarawidwidan ti provincial government.

Agbalin met a training grounds dagiti pasilidad ti gobierno probinsial kas iti BArang-ay demofarm ken Ilocos Sur Tomato Paste Plant, segun pay iti bise gobernador.

Nangrugi ti ISCC a pagadalan iti midwifery ngem iti agdama, maitangtanggayan dagiti kurso nga  HRM, Tourism, Information Technology, Cooperative Management ken dagiti  vocational courses kas iti Caregiving ken Backhoe Operation.#