Agruprupsa a bangkay, nabigbigen

STA. MARIA, Ilocos Sur – Nabigbigen ti agruprupsan a bangkay ti lalaki a nasarakan iti kaunasan idi malem ti Marso 24.

Segun iti report, binigbig ni Cresencia Romero y Ridor, 52, balo, ken residente iti Barangay Maynganay Norte, ditoy met laeng nga ili, ti bangkay nga isu ti anakna a ni Ferdinand Romero y Ridor, 37, baro, babaen ti aruatna nga asul a maong a pantalon ken maroon nga underwear.

Naduktalan ti bangkay kalpasan a nakita ti maysa a residente ti maysa nga aso a nakaammal iti kabkabanga iti Mendoza Street, Zone 5, Barangay Maynganay Sur.

Nagsawar dagiti nagresponde a polis ken dagiti barangay officials ket nasarakanda ti agruprupsan nga akimbaba a paset ti bagi ti biktima iti tengnga ti kaunasan.

Mapapati a sinda wenno intaray dagiti aso ti dadduma a parte ti bagi ti biktima.

Naudi a nakita ti biktima idi Marso 5.#