Agsabongto met laeng ti dalipawen (Maikadua a paset)

Diak napupuotan ti panagarubos ti luak iti pannakalagipko ken ni Matt ken iti relasionmi idi iserrekkon iti garahe ti luganko. Nabayag pay laeng a nagtugtugawak iti uneg kalpasan a maiddepko ti makina. Diak man la namnamaen ngamin a kastoy ti pagbanaganmin a dua. Isu kadi ngata ti rason a pulos a dina man la nadakdakamat kaniak ti kasar uray pay tallo tawenen ti relasionmi? Nangkautak iti tissue iti tissue box iti abay ti kambio ket dinardarasko a pinunasan ti diakon maigawid a lua kadagiti matak. Uray kasanot’ ayatko a mangiwaksi iti lagipko ngem ti saem a kasla naipalnek iti pusok ti mangipalagip a sinaktannak. Inallilawnak.

“Agawid gayam da mommy-m?” Inamadko ta diak mauray idi a mangibaga iti nadamagko a panagbakasion ti pamiliana a nabayagen a di nagaw-awid manipud iti Canada. Dayta ti makagapu a diak pay ida nakita iti personal. Ni laeng ngaminen Matthew a buridek ti nabati ditoy Filipinas─dagiti nagannakna ken dua a kakabsatna ken ti pamiliada─idiayen ti permanente a pagnaedanda.

Kimmita laeng kaniak a kasla maburiburan idi. Kasla awan gaganaygayanna a mangipadamag iti panagawid ti pamiliana.

“Apay, itugotdaka kadin idiay?” Siak manen ti nagsao idi awan maurayko a sungbatna. Nadakamatna idin ti planoda a panangala kenkuana iti Canada ngem saanna a kayat ta adda kano ti pusona ditoy. Napadasnan ti napan nagbakasion idiay idi nakaala iti tourist visa.

“Saan a naragsak idiay. Puro trabaho. Aggangganat a kankanayon dagiti tattao ta sayang ti oras. No dandani pay awan met la ti panawenmi idi nga agpapatang ta ag-overtime-da amin iti trabahoda.” Kastoy ti naliday a panangiladawanna idi iti napadasanna a biag sadiay.

Miningmingak bayat nga ur-urayek ti sungbatna ngem sennaay ketdi ti nangegko.

“Adda papanam inton Sabado? Ipaawisnaka ni mommy.  Addanto simple lunch idiay balay. Uray ta off-tanto a dua kadaydiay.” Nagtibbayoak ta awan raragsakanna a nangibaga kaniak kadayta. Marikriknak nga adda problema. “Mayat tapno ma-meet-mon ti pamiliak.” Immisem met ketdi ngem nadlawko a pilit dayta.

Pinunasko manen ti luak. Kinitak ti relok. Pasado alas tres iti malem. Bimmabaak a dagus idi malagipko ti inkarik a panagtawag iti munisipio ti Sta.Teresita. Asideg a kabagiak ti maysa kadagiti SB member ti ilimi. Isun ti awagak tapno isu man laengen ti makipatang iti rescue team ti ilimi a mapan mangyawid iti bangkay ti buridek da anti Terling. Uray ta isu met ti imbagada idi a rason no apay a napaadda dagiti rescue vehicles─ tapno mangipaay iti serbisio kadagiti umili saan laeng nga iti tiempo ti kalamidad no di ket iti amin a gundaway a masapul ti serbisioda.

Binitbitkon ti backpack-ko kalpasan a makautko ti tulbek ti ruangan ti balay. Nagsarimadengak idi makitak ti bouquet ti puraw a rosas a nakaserra iti mismo a sango ti ridaw. Kaslaak naitugkel a kandela iti nagtakderak. Nagtaliataliawak iti aglawlaw ngem naulimek met ken awan tao. Sa laeng adu ti makita a tao iti mumalem wenno rumabii ditoy subdivision─no kasta nga agsasangpet dagiti estudiante ken dagiti padak nga agtrabtrabaho. Pagammuan ta sumungad ni Ronnie a nakamotor. Nalpas ngatan ti duty-na ta saan metten a nakauniporme. Sabalin sa metten ti rantana. Ita man pay nga umay iti balay. Isu kadi ngata ti nangibati iti sabong iti ruangan? Adu ti mapampanunotko agingga a nakaasideg iti yanko.

“Pinapa-check po kayo ni Dok.” Ammok lattan a ni Matt ti tuktokoyenna. Ti la iramramannan a tao nga istorbuen.

“O, at bakit ikaw. Ba’t hindi siya?” Sarkastiko a saludsodko. Nagkudkod. In-stand-na ti motor sa bimmaba.

“E, kanina po kasi, ayaw niyo siya makausap.” Nadayaw latta a makipatang nupay pudno nga inun-unaak met.

“Magkano ang binayad sa’yo?” Seriosoak a nagdamag.

“Wala po. Public service. Kung kayo nagsasakripisyo para sa mga maysakit na pasyente, kaya ko namang magsakripisyo para sa mga maysakit na doktor…” Nagsarimadeng ngem kasla adda kayatna pay nga ituloy nga ibaga. Makais-isem. “Maysakit na doktor…sa pag-ibig.”  Naangaw a talaga ngem kinapudnona, maas-asianakon ken ni Matthew. Ar-aramidenna amin a pamuspusan tapno laeng maurnos ti relasionmi.

“Sige po dok. Mag-ingat po kayo. Magrereport na po ako.” ‘Inandarnan ti motorna ket pimmanaw. Mapan ngatan agipadamag ken ni Matt.

Forgive me, please.” Kastoy ti nakasurat iti bassit a sticky note idi pidutek ti sabong idi nakapanawen ni Ronnie. Talaga ngarud a ni Matt ti nangted. Amangan no nagtarus itay ditoy kalpasan a dinak makapatang iti nasayaat iti ospital. Naibayagak iti pannakitungtongko kada anti Terling isu a diakon nasipsiputan no nagturonganna.

Saan a maun-uni ni Matthew. Ngem nabagas ti tunggal balikas a rumuar iti ngiwatna. Kasla napili dagita a sasao ken mapili pay ti pakaisawanganna. Ta para kenkuana, aramid ti pakakitaan iti kayatna koma nga ibaga ken iparikna. Isu ti nakatnagan ti riknak kenkuana. Masansan idi a makitak nga aglikaw ken komustaenna dagiti pasiente idi nurse-nak pay laeng iti ospital a yanko ita. Aramidenna dayta, naka-duty man wenno bakantena.

Indissok ti sabong iti center table iti salas. Sinapulko ti nabatik a selpon ket immawagak iti munisipio para iti inkarik a tulong itay kada anti Terling. Imbag laeng met ta dua ti nagatang a rescue car isu nga impasigurado ti kabagiak a konsehal a mayawid ti bangkay. Nagturongak iti kosina. Linuktak ti bassit a ref ket nangipattogak iti baso iti inumek a danum manipud iti sarming a pitcher.  Itay pay a kayatko ti uminum ta kasla namagmaganen ti karabukobko. Nainayad a ginuyodko ti tugaw a naipasirok iti kuadrado a lamisaan sa nagtugawak. Uray ta dua oras pay sakbay a makadanon ti lugan a kinatulagko a mangtulong kada anti Terling. Nataliawko ti egg pandesal a ginatangko iti Baker’s Percent idi kalman. Nangkittabak iti maysa ta nadlawko ti panaggaradugod ti tianko. Oras met ngaminen ti panagmimirienda. Kinapudnona, ni Matthew ti akimpaborito kadaytoy. Isu a kanayon nga adda stock-ko a kastoy iti balay ta adda ipasangok kenkuana no umay aglalo no umay a nakasapsapa ket agkaduakami nga agkape iti rice coffee a gatgatangenmi manipud iti naam-ammomi ken nagbalin a pasientemi idi a taga-Kalinga idi maymaysa pay laeng nga ospital ti yanmi ken nurse-nak pay laeng. Ngem tallo tawenen a nayakar isuna iti dakdakkel nga ospital iti met laeng siudad isu nga agdumakami itan iti pagtrabahuan. Nupay kasta, masansan a masapa nga agbisikleta nga umay ditoy balay manipud iti kaserana nga adda laeng iti igid ti kalsada iti sango ti ospital a pagtrabtrabahuak tapno aggiddankami nga agkape no day shift ti duty-mi a dua.

Nataldiapak manen ti bouquet. Ania manen nga eksena ti aramidenna ngata? Itay, napan kaniak iti ospital tapno agpakawan. Ita ta nagawidak, adda manen surat ti panagdawat iti pammakawan. Immirut ti panagangesko isu a timmakderak tapno uminum manen. Nagnaak nga immasideg iti sarming a tawa. Simmiripak iti ruar ket nakitak ti nataytayag bassit ngem poste ti koriente a kayo ti dalipawen iti mismo nga abay ti gate ti subdivision. Awanen ti sabong daytoy ta agtapogen ti Marso. Permi ti panagamanga idi ni Matthew kadaytoy a kayo gapu iti rukbos ti sabongna ken ti banglo ti ayamuomna. Basta no tiempo ti panagsasabong daytoy, kanayon met nga umay ditoy subdivision. “No mabalin la koma a rangkonek dagiti sabong ti dalipawen nga ited kenka,” yangawna no kua kaniak idi. Makapaliday a ti laengen napintas a langa dagiti nagampayag a sangana ti mangbibiag iti buyana. Ngem ammok nga addanto met laeng panawen a mabuya ken maangot manen ti banglo ti sabongna. Napasennaayak. Nagparang manen iti isipko ti imahe ni Matt. Agpayso a diak pay nakasagana a mangsango kenkuana ken makirinnisut. Ngem diak mailibak nga adda latta iti siled ti pusok ti namnama a maurnosmi met laeng ti susikmi ita kas iti namnama nga ipapaay ti dalipawen a nupay awan sabongna ita ngem agsabongto met laeng iti umiso a tiempona. Nalabit saan pay nga ita ti umiso a tiempo ta sakit pay laeng ti agar-ari ditoy pusok. Makaluaak manen ta arigna pana nga aggigiddan a maitira kaniak ti panagdadarison manen iti lagipko dagiti pasamak no apay a nasakit la unay ti nakemko ita kenkuana.

(AGGIBUSTO)