Agsabongto met laeng ti dalipawen (Maudi a paset)

Naggiddankami idi a nagawid iti balayda kadaydi a bigat ti Sabado. Ngem nabayag ti biahemi isu a dandanin pangaldaw idi makadanonkami. Pinatgak ti awis iti simple a pangaldaw iti balayda iti Ilagan. Naragsak ti isusungadmi ngem nadlawko ti natamnay a pannakilangen kaniak dagiti kasangsangpet a kapamiliana nupay kinapatang ken inisemandak met. Inyaw-awanko laeng uray pay pampanunotek a talaga a didak kayat wenno amangan no didak talaga magustuan para iti anakda aglalo ket babaknang ken addada aminen iti Canada a doliar ti mapetpetpetanda a kuarta. Napanunotko dayta agsipud ta segun iti panagistoria ni Matt, kasla masayanganda pay no kua nga agbakasion ditoy gapu iti magastoda. Isu ngarud nga iti unos ti tallo tawen a relasionmi, diak pulos nakita pay ida. Isu pay ngatan ti rason a kasla adayo ti riknada kenkuana ta isu laeng ti sabali ti prinsipiona no maipapan iti biag, kuarta, ken pamilia.

Welcome to our house, ‘balayan!” Natibong ti nakaar-arte a panagsao idi ni anti Amelia, ti ina ni Matthew. Adda tallo a tao a diak pulos mairupaan ti simmungad iti ruangan. Gapu ta abalayan kunana, pimmaltek iti isipko nga amangan no nakaikamangan dagita ti maysa kadagiti dua a kakabsat ni Matthew. Duma ti panangasikaso kadakuada ni anti Amelia. Kasla awan laeng met ti mangmangeg idi dagiti kakaanakan ken dadduma pay a kapamiliada ta nakadumogda amin nga agpimpindot kadagiti selponda. Nasayyasayya ti nagtugawanda a kunam la no agbibinnain ken dida agaammo. Dua a nataengan a nalabit agassawa ken maysa a kulot ti buokna a babai nga iti tantiak ket kaedadmi laeng met ken ni Matthew dagiti baro a bisita a dimteng. Immasideg ni Matt kadakuada ket nakitak a nakiinnalamano. Ngem sakbay a napan, kimmita kaniak a kasla nagdawat iti pammalubos dagiti matana. Ngem imbes nga alamano laeng, nakibinnesobeso kenkuana ti babbai, ugali a makitkitak kadagiti babaknang kadagiti teleserye.

It’s our pleasure to meet the future wife of my son, Matthew.” Simmalingbat manen ni anti Amelia. Immisemak ken ginandatkon ti tumakder idi makigtotak ta saan a siak ti sinangona. No mabalin la koma a dawatek idi nga agnganga ti batogko a pagtugtugawan tapno maalun-onakon gapu iti pannakapabainko a ni Natasha, ti kulot ti buokna a babai itay ti inyam-ammona a future wife ni Matt. Nabingay ti reaksion kadaydi a gundaway. Ta no apay, siak ti am-ammo dagiti dadduma a kakabagian ni Matt a nobiana. Ken ammok nga ammo met dagiti kapamiliana a naggapu iti Canada ta saannak met nga inlimlimed ni Matt kadakuada ta ipost-na met iti Instagram ken Facebook account-na ti relasionmi. Langa ni Matt ti naburibuboran.

I’m sorry but I am his girlfriend, kunak la koma ngem ni Matt ti pinerrengko ta nakigtotak iti mapaspasamak. Kasla laeng kadagiti mabuybuya nga istoria iti teleserye. Diak ninamnama a kadayta a naragsak koma nga aldaw a pannakakitak kadagiti kadardara ti nobiok ket nagbalin a nakallalagip a pannakaibabain ken pannakapasakit ti nariknak.

Kasla awan nakitkitak idi rimmuarak iti ruangan. Ti pagsakitan la unay ti nakemko, nagbalin nga umel ni Matthew. Dinak man la indepensa. Kayatna a sawen, nagtutulaganda amin a sangapamilia ti inaramidda? Pinagay-ayamandak?

Awan pangyaspingan iti saem a nariknak kadayta nga aldaw ti Sabado. Nupay kasta, simrekak latta iti duty-k kabigatannna. Inkagumaak a saan a maapektaran iti napasamak nupay saan a mailemmeng kadagiti matak ti panagsangit. Itay ti damo a panagkitami, tallo aldaw kalpasan ti saanmin a panaginnuni manipud idi Sabado. Ngem ‘tay kunak a saan pay a nakasagana ti bagik a sanguen isuna ken denggen ti ania man a palawagna ta nalawag kaniakon ti naimatangak.

Siniripko ti relok. Agarup dua oras gayamen ti napalabas. Innalak manen ti tulbek ti kotsek tapno agsubliak iti ospital. Baka dandanin makadanon ti lugan a mangala iti bangkay ti anak ni anti Terling. Inamoyko lattan ti buokko ta masadutakon a mangsapul iti sagaysay. Nagpulbosak met. Sinimpak bassit ti langak tapno di unay madlaw ti panagsangitko a nagawid.

Nakigtotak ta nadanunak manen ni Matt iti ospital ngem saannak a padpadaanan. Kapatpatangna dagiti agassawa─da anti Terling ken angkel Berto. Am-ammona ida ta laklakuanda ngarud iti tirem no kasdiay a pumasiar idi iti balay.  Diak pay laeng nagpakpakita kadakuada. Nagtalinaedak iti uneg ti kotse. Awagak koma pay laeng ti drayber ti rescue car tapno damagek ti yandan idi makitak ti sumsumreken a luganda iti gate. Nakitak ti panagpindot ni Matt iti selponna. Siak ti aw-awaganna ta naganna ti dagus a nagpakita iti iskrin ti selponko. Amangan no ibagana nga addan ti lugan manipud Sta.Teresita. Diakon sinungbatan. Dimsaagak ketdin uray pay diak la koma kayat a makasango isuna.

Naulimek a naglisi ni Matt idi mataliawnak nga umas-asidegen kadakuada. Nalannay dagiti matana. Diak naruam a kasdiay ti langana. Adda pammabalawko iti bagik no apay a kasta la unayen ti kinalidayna itatta. Arigna maip-ipasak. Ngem masapul a saanko nga ipangag ti pusok. Nasken a panunotek nga inallilaw ken pinaglolokuandak ket saankon nga itulok a maulit pay dayta.

Nagin-inut a pimmanaw ni Matt. Kinitanak laeng. Saan a nagun-uni. Ngem inasitganna manen dagiti agassawa sakbay nga immadayo.

“Ikagumaak ti mapanto iti balayyo anti, angkel.” Kasta dagiti sasao nga imbatina. Pinengdak ti bagik a kitaen isuna bayat ti yaadayona nupay kayatko la koman a rakepen ta diakon kaya a kitaen ti kasdiay a langana.

Isu metten ti isusungad ti lugan a naglikaw manipud iti likud a yan ti morge. Naabbatan ngatan ti lua dagiti agasssawa ta saandan a nagsangit idi dagasenda idan. Makasalsaludsodennak no ania ti inobra ken imbaga ni Matt kadakuada itay. Ngem naalak ti nagbain isu a binuyak lattan ida idi agsakayda iti rescue car kalpasan a nakapagyamanda kaniak.

Nadanonak ni Matt nga agur-uray iti balay idi makaawidakon. Nakatugaw iti balkon a kasla awan namnamana. Kayatko a tarayen nga arakupen ngem igawgawidnak ti panunotko gapu iti inaramidna, inaramidda kaniak.

“Adda kadi alaem ditoy?” Inamadko ketdi ngem diak direkta a kinita dagiti matana. Nagngilangil.

“Agpatangta laeng koma.” Siak met ti simmaruno a nagngilangil.

“Uray maudin, please. Diakton agpakpakita kenka no isu ti kayatmo. Uray saanmo a patien ti ibagak basta denggennak laeng.” Timmakder ket sinangonak. Nariknak ti nabara nga angesna ta bassit laengen a pulgada ti di pagdennepan ti rupami. Nataytayag laeng bassit ngem siak ni Matt. Diak sinungbatan. Linuktak ketdi ti ridaw. Nariknak ti isusurotna kaniak iti uneg.

So, ania ti pudno?” Nagtugawak ket pormal ti langak a kimmita kenkuana.

“Ti pudno ket saanak a pudno nga anak ni mommy.” Pasungadna. Nakigtotak ngem diak impadlaw.

“Ammom kadi no kasano nga ipaisaruana kaniak dagiti amin nga intultulongda kaniak manipud gatasko iti kinaubingko agingga a nagbalinak a doktor gapu laeng ta… ta saanko a kayat a suroten ti kayatna?” Agluasiten. “Ngem diak kaya nga allilawen ti bagik ken lalo a dika kaya a saktan.” Bimmuslonen ti luana ket diakon nagawidan ti pannakaibuyog ti riknak kenkuana. Kinautna ti akinlikud a bolsana ket inruarna ti pitakana. Linuktanna ket imbaslagna ti PRC ID-na iti lamisaan. “Sika ken daytoy laengen nga ID ti namnamaek a kukuak ita.” Agtagergeren ti kumapkapsut a timekna.

“Dika maawatan.” Nakapagsaoak met laeng.

“Nupay saan koma a rumbeng ngem gapu ta kuarta laeng met ti napateg kadakuada, intedkon ti amin nga urnongko tapno saan a siak ti pagbayad ni mommy kadagiti nagannak ni Natasha a nakautanganna iti kinalaingna nga agsugal bayat ti kaaddana iti Canada.” Nagbalinen a kasla ubing nga uray la agsingsingloten iti sanguanak isu nga inyawatak iti panyo nga adda laeng met iti bolsak. Damagek koma pay laeng no sino ngarud dagiti nagannakna ngem nagsao manen.

“Diak ammo no pudno ngem awan kanon dagiti nagannakko a gayyem ken katalek daydi daddy iti taltalon. Innaladak kanon sipud pay kinaubingko ta awan anak da mommy a lalaki ket nagadukam kano nga agkakabsat. Imbagadan ti lugar a mabalinko a pakasarakan kadagiti kakabsatko.” Lumawlawag idin ti rupana. “Loraine, pinilika. Ket no palubosannak, nakasaganaakon a mangikallaysa kenka.” Nagparintumeng sa nangiruar iti singsing.

“Di met awan kuartamon? Kasano nga ibagam a nakasaganakan a mangikasar kaniak?” Makasangitak la koman iti rag-o iti awisna ngem inangawko lattan. Nakitak nga immisem ket nagpakita manen dagiti napupudaw ken naurnos a ngipenna.

“Nalaka laeng nga iremedio dayta. Ti dakkel a problema ita ket no umanamongka nga ikabilko dita ramaymo daytoy singsing.” Lalo a limmawan ti isemna. Diakon binaybayag nga inyawat ti imak. Gay-atennak koman nga arakupen ngem nagkiriring ti selponna.

“Ni mommy? Na-highblood?” Napigsa ti timekna.

Please, awaganka madamdama. Ken agsubliak a dagus basta kabaelan ti panawenko. Sorry.” “Agurayka!” Napigsa a pukkawko idi rumuaren iti ruangan. Tinaliawnak. “Sumurotak!”