Footer

Agsangit met uray naranggas a leon

Sarita ni Mancielito S. Tacadena

(Maudi a paset)

 

 

Ngem saanka a simmardeng. Inkarim payen ti panangisinam ken baketmo iti kanito nga ayatennaka. Idi saanmo a maparukma, inusarmo ti kinaekspertom iti social networking tapno sapulem dagiti banag a mabalin a makadadael iti karibalmo. Nasarakam dagiti ladawan dagiti nagbalin a girlfrenna ken dagiti daniw nga insagutna kadagitoy babaen ti pananglimlimom iti internet. Ket kinopiam dagiti links samo imposte  iti wall ti balasang a nangpaay kenka. Idi naammuam a homophobic ti karibalmo, a kagurana dagiti binabai, inusarmo manen daytoy a pangdadael kenkuana babaen ti panagipostem kadagiti gagayyem ken kakabagianna a nangibagaam a binabai daytoy. Ngem kaskasdi a bastedka.

Wen, napukawmon ti simbeng ti panunotmo kadagita a kanito. Saanmo payen a masango a damagen ti sasaaden ti asawam. Gapu siguro iti pannakakumikommo kadagiti aramidmo, dimon napupuotan a dandani payen saankayo nga agsarsarita ken ni Nala. Umanayen ti pannakaawatmo iti ipawpaw-itna a dimo payen damagen no apay a nasursurok ngem iti sueldo ti katulongan ti maaw-awatmo.

Naisurotka iti grupo dagiti agsursurat iti feature stories. Innaladaka a kas official photographer ket agalla-allatiwkayo kadagiti ili tapno kaumanyo dagiti opisial ken alaanyo iti ladawan dagiti napipintas a pagpasiaran iti napiliyo a luglugar. Ad-adda manen a dika naibalay.  Rinabii a hapi-hapi. Ania ngarud ta tunggal opisial a papananyo, adda met iyawatna a naisobre kadakayo. Kinnanmo laeng dagiti saom ta idinto nga ipekpeksam iti blogmo ti guram kadagiti agiwarwarnak a ti la mangpappapintas iti imahe ti politiko ti ubrada ngem nagayad met ti isemmo a mangawat iti ipasukibda kenka no kasta nga aglakadkayo. Nagbalinka a managimbubukod. Ti laengen bagim ti pampanunotem imbes a ti pagsayaatan koma ti pamiliam ti impangpangrunam. Saanmo a napanunot a pagawiden koma laengen ti asawam.

Awan a pulos nangngegmo a reklamo ti asawam. Saannaka a pulos a kinompronta nupay iti tunggal panagawidna, arigna awan namalbaliwan ti biagyo. Saanmo a nauray a nagdamag no adda urnongyo. Ngem iti naudi a panagbakasionna, napansinmo nga awan ganaygayna. Ad-adda nga iti laeng balay ti ayanna ken masansan a nakatugaw laeng daytoy. Kasla kanayon a nabannog. Dinamagmo no adda an-annayenna ngem awan ti nauraymo a sungbatna agingga a naitulodmo iti airport.

Ngem idi laeng napan a lawas bayat ti panagbuyam iti damdamag iti dayta a sardam kagiddan ti panagitangadmo manen iti paboritom nga empe light, nagsullat iti karabukobmo ti insakmolmo a sangakutsara nga ata-ata a baka idi maipatangatang ti damag mainaig iti nagpakamatay a Pinay domestic helper sadiay Singapore. Ni Nala ti adda iti ladawan! Segun iti damag, timmapuak iti maikatallopulo a kadsaaran a pagtaengan ti amona kalpasan a rimmuar ti resulta ti check-upna. Nagpositibo iti HIV virus. Iti panagsukisok dagiti otoridad, naammuan a malaksid iti kina- domestic helperna, nagbalin gayam daytoy a hooker ket agduduma a lallaki ti simmursurotanna kasukat ti panagbayad dagitoy. Ditam a naamiris no apay nga awan ti reklamona uray agsasaruno ti panagdawatmo iti kuarta. Ken dayta met ti makaigapu no apay nga awan ganaygayna iti daydi naudi a panagawidna.

Kalpasan laeng ti dua nga aldaw manipud rimmuar ti damag, adda tawag ti Embahada ti Pilipinas sadiay Singapore a mangipakpakaammo iti pannakaiyawid ni Nala. Ket ita, addakan iti uneg ti bus tapno mapanmo manen sabten ti asawam kas iti sigud nga ar-aramidem no umay agbakasion. Ngem iti daytoy a gundaway, saanmon a maagkan ken maarakup pay ni Nala ta imbes a ti bara ti bagina ti mariknam iti daytoy a panagkitayo manen, ti ketdin kahon a nakaipalaonan ti nalamiis a bangkay ni baketmo ti inka sukonen.

Inyapputmo, Leon, ti dua a dakulapmo iti rupam, saanmon nga intaltalek dagiti masmasdaaw a kaabaymo a pasahero, ket imbulosmon ti im-impem a sangit.#