Footer

Agsasaruno a proyekto dagiti balikbayan iti Cabugao, pammatalged ti panagtalekda ken ni Mayor Edgardo S. Cobangbang, Jr.

Salaysay da Salvador A. Espejo ken Mario Purugganan

(Umuna iti tallo a paset)

 

Idi Septiembre 28 daytoy a tawen, nainaguraran ti Rodolfo S. Sonido Lying-In Center iti Cabugao, Ilocos Sur a naigiddan iti pannakabendision ti napapintas a rural health center. Mismo a da Governor Luis “Chavit” Singson ken ni Vice Gov. Deogracias Victor Savellano dagiti naisangayan a sangaili iti pannakabendision ti agpateg iti P2.3 million a lying-in clinic nga indonar ti pamilia Sonido para iti pannakaipaay ti nasaysayaat pay a serbisio ti salun-at kadagiti agindeg iti Cabugao.

Maysa a kangrunaan a paset ti inagurasion ti panangibasa ni Sangguniang Bayan Member Dr. Carlito S. Pano, chairman ti committee on health, ti resolusion ti konseho munisipal nga idadauluan ni Vice Mayor Danny Gazmen a nangpadayawanna iti pamilia Sonido gapu iti panangibaklayda iti nabusbos iti pannakaipatakder ti lying-in clinic. Naiyawat ti plake ken ni Elpidio Sonido a nangibagi iti pamilia Sonido iti inagurasion.

Nagbalin nga ad-adda pay a nakallalagip daytoy a pasken iti Cabugao agsipud ta malaksid ti pannakainagurar ti lying-in clinic ken iti pannakabendision ti napapintas a rural health unit a mangipaay iti napinpintas a serbisio ti salun-at kadagiti agindeg iti daytoy nga ili, babaen ti panagkinnamayet ti lokal a gobierno ken ti gobierno probinsial, nagun-od ti Cabugao ti pammadayaw a kas umuna nga ili iti intero a probinsia a nakaipaay iti 100% PhilHealth card holders kadagiti marigrigat nga umili ditoy.

Gapu iti daytoy, inyawat ni PhilHealth Northern Luzon Area Vice President Daniel de Leon ti tseke nga aggatad iti P578,000.00 ken ni Mayor Edgardo S. Cobangbang, Jr.

Kinuna ni Mayor Cobangbang a pakarag-oanna unay dagiti nagsasaruno a pagimbagan a naipaay iti ilina.

Inyunay-unay ni Mayor Cobangbang a dakkel a pammatalged ti nabangon a lying-in clinic iti umir-irut a langenlangen dagiti annak ti Cabugao nga agnaeden iti ballasiw-taaw ken ti administrasionna gapu iti aglaplapusanan a  suportada kenkuana para iti pagimbagan dagiti marigrigat a kalugaranda.

Iti naangay a global reunion dagiti taga-Cabugao a naangay iti Sta. Clara, California idi Hulio 19-22, 2012 ken nagsangailian ti Cabugaoeños Association of Northern California, (CANCA), kinuna ni Mayor Cobangbang a talaga a naiparikna kenkuana ti panagkaykaysa dagiti kalugaranna iti panangipategda iti ili a naggapuanda.

Kinuna ti mayor a malaksid a napabaro ken napasudi ti panaglalangen dagiti taga-Cabugao babaen ti nasao a reunion, nagpaay pay daytoy a fund raising a ti naukkon a kuarta ket maipan manen a proyektoda para iti ilida.

“Nangruna nga apresiarenda ti panangipateg daytoy administrasiontayo kadagiti kontribusionda ken awan ti adu a saludsodda ta nakitada a timmakder dagiti nakaipanan dagiti kuartada,” kinuna ni Mayor Cobangbang.

Idi katugtugaw ni Mayor Cobangbang kalpasan ti eleksion idi 2010, nadatnganna a nakadkadan ti kaha ti munisipio ket kangrunaan a problemana ti pondo tapno maiyimplementarna dagiti prioridad a programana.

Nagpatulong ti mayor kadagiti indibidual ken gunglo dagiti kailianna iti ballasiw taaw para kadagiti proyektona a saan laeng a pangpadur-as ti ekonomia ti ilina no di pay iti pannakaital-o ti kalidad ti panagbiag dagiti kailianna.

Tallo a prioridadna a proyekto ti kiniddaw ti mayor kadagiti kalugaranda iti ballasiw taaw a pakibinnadanganda a maipatakder: ti lying-in clinic, streetlights ken pasilidad para iti playground iti parke ti ili.

“Nagpilikami kadagiti napintas a proyekto a mabalinda ti makibinnadang wenno makipagtrabaho (work hand in hand) iti gobierno munisipal,” kinuna ni Mayor Cobangbang sana innayon nga indatagna kadakuada ti program of works a nakailanadan dagiti mabusbos iti pannakaaramidna, ti plano wenno design sa naited kadakuada ti waya a mangpili iti kontraktor a mangitrabaho iti proyekto.

Maysa a proyekto a nakita ni Mayor Cobangbang a kasapulan unay ti ilina ti lying-in clinic a pagganakan dagiti masikog nangnangruna dagiti saan a makabael a mapan aganak kadagiti pribado nga ospital. Ngem dakkel ti pondo a mapattapatta a mabusbos iti pannakaipatakder ti nasao a klinika.

(Adda tuloyna)