CABUGAO, Ilocos Sur – Uppat nga aldaw kalpasan ti pannakaipakat ti gun ban, namansaan ti rekord ti kapolisan ditoy gapu iti insidente ti pammaltog a napasamak sadiay Sitio Inanama, Barangay Pug-os ditoy nga ili idi rabii ti Enero 14.
Kas maibatay iti report manipud iti Cabugao police station, mapapati a pinaltogan ni Lobemino Baclig y Sayo ti kabsatna a ni Emilio gapu iti susik iti nagbaetanda ngem nagmintis ket maysa a Joy Castillo y Baclig, 44, residente met laeng iti nadakamat a barangay ti natamaan iti naiwawa a bala.
Iti inisial a panagimbestiga dagiti polis, bayat ti panagsubang dagiti agkabsat, rimmuar ni Castillo iti balayda tapno kitaenna ti anakna a ni Calvin idi nanalbuong iti namindua ket natamaan ti luppo ti biktima iti naiwawa a bala.
Naitaray ni Castillo iti Sinait District Hospital para iti pannakaagas ti dunorna idinto a naglibas ti suspek kalpasan ti pammaltog. Segun iti doktor a nangtaming ken ni Castillo, simrek ti bala iti makannigid a luppona sa limsot iti makannawan a luppona.
Nakarekobre dagiti nagresponde a polis iti maysa a buli manipud iti cal. 9mm iti nakapasamakan iti pammaltog
Iti pannakaisurat daytoy, birbiroken dagiti polis ni Baclig a naglibas kalpasan ti pammaltog.
Babaen ti Comelec Resolution No. 3328, maipakpakat iti pagilian ti gun ban a nangrugi itay Enero 9 bayat ti election period para iti 2016 presidential ken lokal a panagpipili.
Bayat iti daytoy a panawen, maiparit ti panagikuyog iti asinoman iti paltogna wenno makapatay nga armas iti ruar ti balayna.
Maiparit met kadagiti kandidato ti panangiyemploda kadagiti pribado nga armado a tattao, dagiti laeng propesional a security personnal.
Nupay kasta, mapalubosan dagiti kameng ti Philippine National Police (PNP) ken Armed Forces of the Philippines (AFP) pakairamanan dagiti blue guards ken dadduma pay a security government agencies nga agikuyog iti paltog bayat iti panagtrabahoda iti lugar ti responsibilidadda.
Kinuna ti Comelec a naipakat ti gun ban agsipud ta maitudtudo a dagiti agraraira a paltog ti kangrunaan a makagapu iti nadamsak a panagpipili.#
