Agtagtagilako, napaltogan, natay

CANDON CITY – Nagkallugong iti bull cap, nakaaruat iti asul a bado ken cargo pants ken nakasinelas ti suspek a nanggudas iti maysa a vendor iti sanguanan ti maysa a pagtagilakuan idi agsapa ti Mayo 11.

Nabigbig ti biktima ti pammaltog a maysa a Mariano Guising, Jr. y Casinova, 37, baro, ken residente iti Barangay Dinaratan, Salcedo, Ilocos Sur.

Saan pay a nabigbig ti pimmaltog kenkuana nupay nakaala dagiti inbestigador iti footage ti CCTV Camera a naimuntar iti 7-Eleven Convenience Store.

Limtuad pay iti footage ti CCTV Camera a naipasdek iti 7-Eleven Convenience Store a sinurot ti suspek ti biktima sana pinaltogan ti tengnged daytoy idi makaasideg.

Iti inisial a panagimbestiga dagiti polis, bayat ti kaadda ni Rick Elvin Navarro y Likot, 28, baro, vendor, ken residente iti Sto. Domingo, Ilocos Sur iti puestona, nakangeg iti kanalbuong ket nakitana laengen ti biktima a napasag iti kalsada.

Intaray dagiti nagresponde a polis ni Guising iti St. Martin de Porres Hospital ngem pimmusay daytoy bayat ti pannakaagasna.

Nagsagrap ni Guising iti sugat iti tengnged a naggapu iti cal. 9mm kas maibatay iti kapsula a nasarakan dagiti inbestigador iti crime scene.

Nakasarak pay dagiti polis iti maysa nga aglatlati a hunting knife ken nangisit a Nokia cellular phone manipud iti ikut ti biktima.

Nangisayangkat dagiti polis iti hot pursuit operation maikontra iti suspek ngem nakalusot daytoy.

Insubmite dagiti inbestigador ti kapsula manipud iti cal. 9 mm para iti ballistic examination ken cross matching tapno maammuan no naaramat daytoy kadagiti umasping a pammaltog.

Kabayatanna, sinigurado la ketdi ti kriminal a saanen a makalasat pay ti biktima kas paneknekan iti kaadu dagiti imputokna kenkuana iti pammaltog a naisayangkat iti Barangay San Gaspar, Salcedo, Ilocos Sur idi rabii ti Mayo 13.

Saanen a naiyabut dagiti nagresponde a polis ti biag ni Carlos Cosning y Gironella, 48, naasawaan, mannalon, ken residente iti Barangay San Gaspar, Salcedo gapu kadagiti sinagrapna a sugat iti nadumaduma a paset ti bagina.

Sakbayna, personal nga inreport da Jeffrey Gabayan y Cortez ken Harry Gabayan y Mangay-ayam agpada a residente iti Brgy. San Gaspar, Salcedo, Ilocos Sur, ti nasao nga insidente iti pammaltog iti lugarda a mapattapatta a napasamak idi agarup alas 11:30 ti rabii ti nadakamat a petsa.

Segun kada Jeffrey ken Harry, nakangegda iti nagsasaruno a putok iti compound ti biktima.

Madamdama, nakangegda iti banurbor ti motorsiklo a nagturong iti laud a direksion.

Nadatngan dagiti nagresponde a polis ti biktima a nakadalutaytay iti likudan ti balayna.

Intaray dagiti polis ti biktima iti Salcedo Medicare Hospital ngem indeklara ti doktor a nangtaming kenkuana a dead on arrival.

Nagsagrap ti biktima iti innem a sugat iti nadumaduma a paset ti bagina a mapapati a nagtaud iti cal. 45 kas maibatay kadagiti walo a kapsula ken maysa nga slug a nasarakan dagiti inbestigador iti crime scene.

Nakarekobre pay dagiti inbestigador iti crime scene iti maysa a nangisit a Nokia cellphone, assorted a carpentry tools a pakairamanan ti screw driver, bolo, solvent, steel saw ken flashlight, blood stain, ken nangisit a sandal ti babai.

Nakasarakda pay iti balay ti biktima iti dua a motorsiklo, ken maysa a gauge 12 shotgun a paltik.

Iti panagimbestiga dagiti polis, napalikudan ti biktima ken adayo ti naggianan ti di nabigbig a suspek a nangpaltog kenkuana.#