Agtaktakaw iti barut ti koriente, nakamatan ti ima ti linteg

STO. DOMINGO, Ilocos Sur – Saan a mailemmeng nga agnanayon ti dakes nga aramid. Leksion daytoy ti maysa nga agtaktakaw iti barut ti koriente kalpasan a nasukalan iti ikutna dagiti ilemlemmengna a naputputed a barut.

Resulta: napilaan ni Roland Morales y Tagalan, 30, naasawaan, ken residente iti Sitio Cabaroan, Barangay Cabaritan, ditoy nga ili, iti kaso a panag-labsing iti RA 7832 wenno Anti Pilferage Act of 1994 iti provincial prosecutor iti Vigan City.

Segun iti report manipud iti polis, sabali ti gagara da Barangay Tanod Noel Tablatin ken Arnel Arellano idi napanda iti balay ni Morales ta pag-saludsodanda koma maipanggep iti napukaw a selpon ti maysa a John-John Tagalan.

Mapapati a nagsuspetsa dagiti tanod idi nadlawda ti panangilemmeng ni Morales iti maysa a nangisit a bag.

Idi sukimatenda koma ti bag, kellaat a timmaray ni Morales.

Kinamat dagiti tanod ti suspek agingga iti naipiskotda.

Idi linuktanda ti bag, nakitada a naglaon daytoy kadagiti naputedputed a barut ti koriente.

Inannugot ni Morales a tinakawna dagiti naputedputed a barut nga agatiddog amin iti sumurok kumurang 143 meters ket pasetda dagiti streetlights iti motorpool ken public plaza daytoy nga ili.#