Footer

Agtatakaw iti motorsiklo, naipiskot dagiti polis

VIGAN CITY – Nasurok a sangapulo a kaso ti panagtakaw iti motorsiklo ti sanguen ti maysa a baro kalpasan a natiliw bayat a nakalugan iti motorsiklo a tinakawna idi malem ti Hunio 16  ditoy siudad.

Natiliw ni Antonio Rosario y Alcansares, alias Bornoc, 32, tubo ti Bangued, Abra ngem agnaeden iti Barangay 3 ditoy siudad, iti pursuit operation nga insayangkat dagiti polis kalpasan nga inreport ti kaudian a biktimana ti pannakatakaw ti motorsiklona.

Segun ken ni Police Chief Inspector Ernesto Navarro, Jr., OIC chief of police ditoy, nagpulong ni Dominador Rapisura, agtrabtrabaho iti Archbishop Palace, residente iti Pantay Daya, Vigan City, a nakitana nga intaray ti maysa a lalaki ti motorsiklona a nakaparking iti asideg ti Palasio. Idi impakita ti polis iti retrato ni Rosario, nabigbig ti biktima nga isu ti nangitaray iti motorsiklona.

Nagsawar dagiti polis ket nasalamaanda ni Rosario iti Rizal Street ditoy met laeng siudad a nakalugan iti nasao a motorsiklo ket inarestoda sada impan iti police station.

Mapapati nga inannugot ti suspek nga isu ti nangitaray iti motorsiklo ken impalgakna pay dagiti tattao a napanna nangilakuan kadagiti immuna a tinakawna a motorsiklo.

Agdagupen iti sangapulo a natakaw a motorsiklo ti narekobre dagiti polis ditoy manipud kadagiti nangilakuan ni Rosario ket naipanda iti police station tapno maaramat nga ebidensia iti maisagsagana a kaso maikontra iti suspek.

Namnamaen dagiti polis nga ad-adu pay ti marekobreda kabayatan ti agtultuloy a panangimbestigada iti suspek.

Awan pay ti impalgak ti suspek a kaduana nga agtaktakaw iti motorsiklo.

Iti interbiona kadagiti lokal a radio ditoy, kinuna ni Navarro a kangrunaan a puntiria ti suspek dagiti lugan dagiti biktimaenna a sumrek a mapan agtrabaho kadagiti pasdek.

Mapapati a pagsusukaten ni Rosario dagiti partes dagiti motorsiklo a natakawna tapno saan a nadaras a mailasin dagiti biktima.

Segun iti COP, inlako laeng ni Rosario dagiti tinakawna a Dio motorcycle iti manipud iti P1,500-3,000.

Iti Metro Vigan a pakairamanan ti Vigan, Bantay, Caoayan, San Vicente ken Santa ti mapapati a pagdakdakiwasan ni Rosario nga agtakaw kadagiti motorsiklo.

Ngem maysa a biktima a taga-Sto. Domingo, Ilocos Sur ti nagkuna a mailasinna a kukuana ti maysa kadagiti narekobre a motorsiklo.

Kinuna ni Navarro a nakasuan ti suspek iti panagitalaw iti motorsiklo idi pay 2006 ngem nadismis dagiti kasona gapu ta awan metten ti interes dagiti natakawan kalpasan a napasublida ti luganda.

Indagadag ni Navarro kadagiti biktima ti panagmaymaysada a mangipila iti kaso maikontra ken Rosario tapno nadagdagsen ti pannusana.

Iti pannakaisurat daytoy, agdadarison dagiti tattao a natakaw ti motorsikloda tapno mapanda lasinen dagiti narekobre dagiti polis nga inlako ni Rosario.#