Agtawen iti 73 a lalaki, pinapatay riding in tandem

BANTAY, Ilocos Sur – Sabali manen a pammapatay ti insayangkat dagiti armado a tattao a nagkasakay iti motorsiklo iti kalsada nasional a sakup ti Sitio Baoay, Barangay Paing daytoy nga ili idiĀ  Nobiembre 20 iti baet ti nainget a kampania ti kapolisan maikontra iti kriminalidad.

Nagresponde a dagus dagiti polis ditoy babaen ti panangidaulo ni PSI Andrew Rabang kalpasan a nakaawatda iti pulongĀ  manipud ken ni Barangay Kagawad Artemio Pizarro, 58, naasawaan, ken residente iti nadakamat a barangay nga adda napaltogan iti kalsada nasional a sakup ti barangayda.

Nadatnganda ti biktima a nabigbig a maysa a Jaime Bueza y Cuenta, 73, naasawaan, ken residente iti Barangay Manueva, Santa, Ilocos Sur, a napaltogan iti uneg ti luganna a naikanal iti amianan a paset ti kalsada, sumagmamano a metros ti kaadayona iti nakapaltoganna.

Iti panagimbestiga dagiti polis, agdaldaliasat nga agpadaya ti Nissan Sentra a minaneho ni Bueza, maris blue-green, addaan plate no. 180, ket iti nadakamat a barangay, dua a lallaki a nakalugan iti motorsiklo ti nang-obertek iti kotse sa pinaltogan ti back rider ti biktima iti sumagmamano a daras.

Nupay nasugatan, nabaelan pay laeng ti biktima a minaneho ti luganna sakbay a napukawna ti kontrolna iti manibela ket naikanal iti amianan a paset ti kalsada.

Naglibas dagiti di nabigbig a suspek a nakalugan iti di pay ammo ti klasena a motorsiklo iti di ammo a direksion.

Nagsagrap ti biktima iti sugat iti makannigid a lapayag ken tengngedna, ken makannawan nga akinngato a paset ti abagana ket intaray dagiti polis iti Metro Vigan Cooperative Hospital ngem indeklara ti doktor a nangtaming kenkuana a dead on arrival.

Saan a naan-ano ti asawana a ni Leticia Bueza y Manungsong, 68.

Nakasarak dagiti inbestigador iti tallo a kapsula ken dua a deformed slugs a mapapati a naggapu iti cal. 45 iti nakapasamakan ti krimen.

Madama ti panagimbestiga dagiti polis no ania ti motibo iti pammapatay.#