Footer

Agtuloy naing-inget a panagpalutpot mainaig iti naraut a shabu lab iti La Union: PNP chief

BAGUIO CITY – Kinuna ti hepe ti PNP nga agtuloy iti naun-uneg nga inbestigasion iti naraut a laboratorio ti shabu iti La Union iti baet nga addan narelibo a police officers a mapapati a nainbolbar iti operasion daytoy.

“Maituloy ti naun-uneg nga inbestigasion mainaig iti daytoy a banag,” kinuna ni PNP Chief Avelino Razon, Jr. idinto nga inyunay-unayna a dina ipalubos nga agbalin a law breakers ti sinoman a kameng iti law enforcement group.

“Mangiwayatkami iti aksion maikontra kadagiti tattao a nangprotektar iti shabu laboratory,” kinuna ni Razon bayat ti pannakiuman ken-kuana ti media iti ipapasiarna iti Philippine Military Academy itay nabiit sakbay ti panagretirona inton Septiembre 27.

Maipalagip a rinaut ti nagtipon a bunggoy ti La Union Police Provincial Office nga indauluan ni Provincial Director Senior Supt. Noli G. Taliño ken ti  Philippine Drug Enforcement Agency Regional Office I nga indauluan ni Police Supt. Jane Andres Aunso ken ti Naguilian Police Station Station nga indauluan ni Police Chief Inspector Erwin Dayag ti nasao a laboratorio a naipasdek iti Barangay Bimmotobot, Naguilian, La Union.

Natiliw iti operasion  da George Cordero, mapapati a nangupa iti pagtaengan a nakasamsaman kadagiti ramramit a maaramat iti droga ken da Andy Tangalin ken Dante Tomas Palaganas, caretakers iti nasao a laboratorio.

Nakakumpiska dagiti rimmaut kadagiti kemikal ken ramramit a kuna dagiti opisial ti kapolisan a makapartuat iti 180,000 kilos a shabu a mapattapatta nga agpateg iti maysa a trillion.

Mapapati a maysa a sindikato iti droga a Chinese ti mangpatpataray iti nasao a laboratorio.

Sumagmamano a police officers a pakairamanan ti hepe ti polis ti Naguilian ti narelibo gapu iti mapapati a pannakainbolbarda iti nasao a laboratorio.#