Agtultuloy a kampania kontra droga: Aglaklako iti kalamay, napakatan iti buy bust operation

CANDON CITY – Balligi ti operasion nga inwayat ti kapolisan maikontra iti maysa a calamay vendor iti uneg ti maysa a pagkaseraan ditoy siudad idi malem ti Hulio 14.

Iti insayangkatda a buy bust operation iti dayta nga aldaw sadiay Barangay Ayudante, Candon City, partikular iti Paulina Inn, saan laeng a droga no di pay paltog ti nakumpiska dagiti operatiba ken ni Gener Marzada y Turing, 29, baro, natibo iti San Agustin, San Fernando, Pampanga ken agdama nga agnaed iti Barangay Ayusan, Sta Lucia, Ilocos Sur.

Malaksid iti nakumpiskada a maysa a heat sealed plastic sachet a nagkarga iti white crystalline substance a masuspetsa a shabu, maysa a nakalukat a plastic sachet a nagkarga iti tallo nga small heat sealed transparent plastic sachets a naglaon iti mapapati shabu, ken pannakarekobreda iti P500.00 a buy bust money iti ikut ti suspek, nakakumpiska pay dagiti polis iti homemade a cal. 38 nga awanan iti serial number nga addaan iti lima a bala a karga ti cylinder, 11 a bala ti cal. 38, 4 a bala ti cal. 357 ken maysa a dud ammunition ti cal. 45 ken assorted a drug paraphernalia iti uneg ti up-upaan ti suspek a kuarto.

Naipan ti suspek ken dagiti nakumpiska kenkuana iti kustodia ti Candon City police station para iti umno a disposision.

Iti pannakaisurat daytoy, maisagsaganan ti kaso a panaglabsing iti RA 9165 ken RA 10591 maikontra ken ni Marzada.

Kabayatanna, droga ken drug paraphernalia ti nakumpisa dagiti nagtitipon nga operatiba ti kapolisan iti balay ti maysa a nakalista a top 3 drug personality iti Vigan City idi bigat ti Hulio 13.

Sinukisok dagiti nagtitipon nga elemento ti CIDG Ilocos Sur, Vigan CPS, PIB, ISPAIDSOTG, PDEA ISSET, ISPPSC ken HPG ti balay ni Geronimo Garcia Arcano, 53, naasawaan, ken residente iti Barangay Capangpangan, Vigan City babaen ti bileg ti search warrant nga inyisio ni Judge Francisco Ante, Jr. ti Municipal Trial Court in Cities, Vigan City, Ilocos Sur a napetsaan Hulio 8, 2015.

Dagiti sumaganad dagiti nakumpiska iti balay ni Garcia: 2 nga small heat sealed transparent plastic sachet a nagkarga iti mapapati a shabu; 2 disposable lighter; maysa nga improvised stick clip; ken 20 transparent plastic bag size 2X3 a para repacking.
Naipan ti suspek iti CIDG Ilocos Sur Police Provincial Office, Camp Elpidio R. Quirino, Bulag, Bantay, para iti dokumentasion ken umisu a disposision.#