Agtutubo, binugbog ti 4 barito

CANDON CITY – Iti baet a matatao a lugar ti plasa ditoy, maysa nga agtutubo ti kinabkabil ti uppat a barito a puon ti nakayospitalanna.

Nainaganan ti biktima  a ni Romeo Galicia II, 20, ken residente iti barangay Tablac, ditoy siudad idinto a nabigbig dagiti nangbugbog kenkuana a da Trojan Tuazon, 15; TJ Salarzon, 17; Ronnie Galima, 16; ken EJ Sarmiento, 16,  agpapadada a residente iti barangay San Juan, ditoy met laeng a siudad.

Segun iti inbestigasion ti polis, agpaspasiar iti plasa ti biktima ken di nainaganan a kakaduana ket  nagsasarakda kadagiti suspetsa.  

Iti awan a rason, dinarup dagiti suspetsa ti biktima ket maysa kadakuada ti   mapapati a nangbarsak iti biktima.  

Nagtataray nga immadayo dagiti kakadua ti biktima.

Nasugatan ti ulo ti biktima ket naitaray iti ospital para iti panakaagasna.  

Di ammo no apay a kinabil dagiti suspetsa ti biktima. (Danny Antalan)