Footer

Agtuturay, naragsakanda iti desision ti Korte Suprema a pinalen ti panagsiudad ti Batac

BATAC CITY – Maragsakan dagiti agtuturay ditoy iti panangideklara ti Korte Suprema a pinal ti desisionna a nangapirma iti konstitusionalidad dagiti linteg a nangkonbert kadagiti 16 a munisipalidad a siudad.

Iti interbio kenkuana ti Bombo Radyo Laoag, kinuna ni Batac City Vice Mayor Ronald Allan Nalupta a makapagtignayda met laengen kalpasan a nagbalinen a pinal ti desision ti Korte Suprema a nangpasingked iti kinasiudad dagiti 16 a munisipalidad a pakairamanan ti Batac.

Iti butos a  7-6, inapirmaran ti Korte Suprema a konstitusional ti konbersion dagiti 16 a munisipalidad.

Karaman dagiti nagbutos a pabor iti cityhood laws da Chief Justice Renato Corona, Associate Justices Presbitero Velasco Jr., Teresita Leonardo-De Castro, Roberto Abad, Jose Perez, Jose Mendoza ken Lucas Bersamin.

Saan a pimmabor da Associate Justices Martin Villarama Jr., Ma. Lourdes Sereno, Conchita Carpio-Morales, Arturo Brion, Diosdado Peralta ken Antonio Carpio.

Nag-inhibit da Associate Justices Mariano del Castillo ken Antonio Eduardo Nachura.

Nagbaliwbaliw ti desision ti Nangato a Pangukoman mainaig iti konstitusionalidad ti cityhood laws a nangkonbert dagiti 16 a munisipalidad a siudad.

Maipalagip nga idi 11th Congress, napagbalin a linteg ti 33 a gakat a mangkonbert dagiti 33 a munisipalidad a siudad. Nupay kasta, saan a naaktuaran dagiti gakat a mangkonbert a siudad dagiti sabali pay a 24 a munisipalidad.

Idi maika-12 a Kongreso,  napagbalin a linteg ti RA 9009. Inadaptar met ti 12th Congress ti Joint Resolution No. 29 a mang-exempt kadagiti 24 a munisipalidad a saan a naaprobaran ti gakatda a mapagbalinda a siudad iti P100 milion income requirement kas sagudayen ti RA 9009. Ngem saan a naaprobaran iti Senado ti nasao a resolusion.

Kasta met a saan manen a naaprobaran iti Senado ti nasao a resolusion a pinabaro nga inadaptar ti Kamara.

Ngem babaen ti ballakad ni Sen. Aquilino Pimentel, sangapulo ket innem a munisipalidad ti nangipila iti bukodda a gakat nga agbalinda a siudad.

Idi naaprobaran dagiti gakat a mangkonbert dagiti 16 a munisipalidad iti kinasiudad, nangipila ti League of Cities of the Philippines iti petision a nagkunaanna a saan a konstitusional ti Cityhood Laws agsipud ta linabsingna ti Section 10, Article X ti Konstitusion ken ti Section 6 Article X a nangituding iti equal protection clause agsipud ta bumassit ti bingay dagiti existing a siudad iti Internal Revenue Allotment

Idi 2008, inkeddeng ti Korte Suprema a saan a konstitusional ti Cityhood Laws ken saan a nagun-od dagiti 16 a munisipalidad ti P100-milion income requirement para iti kinasiudad kas sinaguday ti RA 9009.

Ngem idi Disiembre 21, 2009, binaliktad ti Korte Suprema ti immuna a desisionna ken inapirmaranna daytoy idi Hunio 2010.

Ngem idi Agosto 24, 2010, binaliktad manen ti Korte Suprema ti bagina ket imbagana  a saan a konstitusional dagiti 16 a cityhood laws.

Idi Pebrero 15, 2011, indeklara ti Korte Suprema a konstitusional ti Cityhood Laws.

Iti daytoy kaudian a desisionna, inapirmaranna ti konstitusionalidad ti Cityhood laws.

Panggep ti League of Cities ti agapela latta iti Korte Suprema idinto nga imballaagna ti panangipilana iti impeachment complaint kadagiti justices a pimmabor iti konstitusionalidad ti Cityhood Laws.#