Aguliteg, nagriri, maysa napaltogan

STA. MARIA, Ilocos Sur – Pinaltogan ti maysa a baro ti ulitegna a nagramut iti panagsubangda gapu ta nagbirok ti laklakay iti sabali pay a sidada.

Nainaganan ti biktima a ni Juanito Cacho y Mina, 52, idinto a ni Ernie John Cacho y De Juan, 27, ti nangpaltog kenkuana.

Sakbay ti pammaltog, naggiinom dagiti aguliteg ken dua pay a kakaduada idi sardam ti Hunio 29 iti paraangan ni Juanito Cacho.

Kalpasan ti drinking session, nangrabii dagiti aguliteg ngem naparnuay ti panagsubangda idi agbirok ti laklakay iti sabali pay a sidana.

Mapapati nga innala ni Ernie  John ti cal. 22 magnum a paltogna sana pinaltogan ti ulitegna a nakatiruan ti ulo daytoy.

Naitaray ti biktima iti Central Ilocos Sur District Hospital, Narvacan idinto a boluntario a simmuko ti suspek iti polis.

Saan a nabirokan ti paltog a nausar iti pammaltog.#