Agyamantayo kadagiti parabur a dimteng iti biagtayo

ITI inaldaw-aldaw a panagbiagtayo, agyamantayo koma iti parabur a nasagraptayo manipud iti Mannakabalin a Dios. Mabalin a dakkel ti impaay dagitoy a parabur ti Namarsua iti panagbiagtayo, iti panagbalbaliw ti kasasaadtayo, iti paggargarawantayo a gimong wenno iti pannakatun-oy dagiti arapaaptayo para kadagiti ipatpategtayo iti biag.

Idi Father’s Day, nabsogkami iti ayat manipud kadagiti ipatpategmi ditoy lubong. Di masbaalan ti panagyamanmi ta uray iti baet ti adu a nagkuranganmi a kas ama, iti bukodda a wagas, impeksada ti pammategda kadakami, intedda amin a kabaelanda a mangipaay iti nakallalagip a padasmi iti daytoy nga aldaw. Ammomi a dayta ti bukodda a wagas a panagyaman kadagiti sakripisio nga imbaklaymi iti kallabes tapno madanonda ti kasasaadda iti agdama.

Naimnas gayam ti rikna nga umawat iti dimo dawdawaten a sagut manipud iti maysa nga ipatpateg ti biag. Nasamsam-it gayam ti sagut nga agburayok iti kaunggan ti puso. Uray gayam ingget numo ti maiyawat wenno maitanggaya a sagut no bulanos a nagtaud iti puso, agbalin daytoy a kapatgan a sagut a dimo isukat iti linaklakasa a kinabaknang.

Adda kadi pay dawatenmi a dakdakkel a bendision? Simple laeng ti panagbiag a birbirokenmi. Umdasen kadakami nga agsimpa iti biag dagiti ipatpategmi ket dakkel a pagyamananmi iti Namarsua kadagitoy a bendision ken paraburna kadakami.

Adda dagiti kailiantayo a dida mapmapnek iti kasasaadda iti biag. Uray iti baet ti kinalabon a sagsagrapenda, kayatda ti agsagrap pay iti dakdakkel a bendision ken pagimbagan. Kayatda nga ukkonen amin a pammadayaw, kinalatak, nabilbileg pay a posision wenno nangatngato a pedestal ti panagbiag.

Iruknoymi ngarud ti maysa nga estoria a namnamaenmi a mangted iti leksion kadagiti sobra unay nga agarapaap, kadagiti saan a mapmapnek iti agdama a kasasaadda iti biag ket kayatda a ngumatngato pay iti tukad ti biagda uray no adda mabaddekanda iti baba. Naragsak a panagbasa.

ADDA idi agtiktiktik iti bato a solo nga agbibiag iti maysa a kalapaw. Nupay nalaing nga agtiktik, nakurapay ken rutroten dagiti kawesna.

Maysa nga aldaw, kabayatan ti panagtiktikna, nangngegna ti anabaab ti tallaong a nagtitipon iti igid ti dalan. Babaen ti pukkawda, naammuanna a bisitaen ti ari ti purokda.

Timmipon ti agtiktiktik iti tallaong ket napnuan raem a nangmatmat iti ari a nakakawes iti nalamuyot a seda idinto a kabkablaawan dagiti umili. “No koma adda met kaniak ti bileg ken kinadaeg ti ari,” nakunana iti panunotna.

Nangngeg ti langit ti kararagna ket nagbalin a nabileg nga ari, nakasakay iti kabalio ken pagkurkurnoan ti tallaong.

Ngem kabayatan ti kalgaw, napaliiwna no kasano a nagkalimduosan dagiti taona ken nasdo dagiti dinguen ken naglaylay dagiti mula iti nabileg a raya ti init. Timmangad iti langit sana kinuna, “Agbalinak koma nga init.” Pinatgan manen ti langit ti dawatna.

Insaruagna ti nabileg a lawagna iti daga ket naglemmeng dagiti ari ken prinsesa iti sirok dagiti payongda. Kimmapsut dagiti mannakigubat iti perrengna. Uray dagiti mula kadagiti kataltalonan, nagtamedda kenkuana.

Ngem maysa nga aldaw, inaplagan ti napuskol nga ulep ti ngatuen ti daga ket pinugsatna ti raya ti init.

Idi makita ti agtiktiktik nga adda sabali a nabilbileg, dinawatna nga  agbalin nga ulep – nga isu ti nagbalinanna.

Ita, sinallukobanna ti raya ti init ket nariknana ti kinapategna. Nagbalin a higante nga ulep a nangibuang iti tudo iti amin: kaykayo, animal, tattao. Nangriknada amin iti bilegna, malaksid ti dakkel a bato.

Isu a dinawatna nga agbalin a bato – nga isu ti napasamak. Ket awan ti nariknana a pannakatignayna iti init, wenno tudo wenno aniaman nga isangbay ti nakaparsuaan.

Ngem maysa nga aldaw, inasitgan ti maysa a lalaki a nagawit iti bag. Nagsardeng ti lalaki, inruarna ti paet ken martiliona sana rinugian a tiniktikan ti bato. Adtoy gayam ti nabilbileg ngem bato – ket inkararagna nga agbalin a kasta.

Nangngeg ti langit ti anek-ekna ket pinagbalinna a kumikitikit.

Napneken ti lalaki iti kasasaadna ket siraragsak a nagkitikit kadagiti nagpipintas a sukog ken buya a dinaydayaw dagiti tattao gapu iti kinapulido ti pannakaaramidda.#