Ahente, teknisian, napaltogan

SAN JUAN, Ilocos Sur – Dua a lalaki ti nagandat ti biagda iti nagsina a pammaltog a napasamak ditoy ken iti MagsingalĀ  idi Hunio 4 ken 6.

Napaltogan ni Allen Abijay y Camacho, 36, naasawaan, ahente ti Sun Cellular ken residente iti Barangay Tamag, Vigan City a nakasugatanna iti likudna bayat ti panagdaliasat ti SYM a traysikel a minanehona iti kalsada nasional a sakup ti Barangay Lapting, ditoy nga ili idi agarup 10:45 ti rabii ti Enero 4.

Saan a naan-ano ti asawana a ni Rutyh Abijay y Caasi, 40, ken ti anakda a ni Anna Ruthlyn Abijay y Caasi.

Segun iti report, tallo a motorsiklo ti mapapati a kimmamat iti traysikel a minaneho ni Abijay ket idi makaasidegda, pinaputokan ti backrider ti maysa kadagiti motorsiklo ti biktima iti sumagmamano a daras .

Nakarekobre dagiti inbestigador iti dua nga empty shells a mapapati a naggapu iti cal 9mm pistol iti nakapasamakan ti pammaltog.

Madama ti inbestigasion dagiti polis mainaig iti pammaltog.

Kabayatanna, saan pay a nakapuot iti ospital a nakaitarayanna ni Josephine Navarro y Ines, 27, naasawaan, teknisian ti feeds, taga-Barangay Katipunan, Sinait ngem agnaeden iti Sitio Lussoc, Barangay Manzante, Magsingal, Ilocos Sur maigapu iti pannakapaltogna iti barangay road a nagbedngan ti Barangay Pagsanaan ken Cabaroan, Magsingal idi agarup alas 5:15 ti malem ti Hunio 6.

Naammuan iti inbestigasion nga agdaldaliasat ti XRM a motorsiklo a minaneho ni Navarro iti nadakamat a lugar idi inasitgan dagiti di nabigbig a suspek a nagaramat iti helmet ken nangisit a diaket nga addaan iti hood a nakalugan iti asul nga XRM motorcycle sa pinaltogan ti maysa ti biktima a nakapuruan ti bukot daytoy.

Naitaray ti biktima iti Magsingal District Hospital sa naiyalis iti Gabriela Silang General Hospital.

Madama ti inbestigasion ket sumarsaruno ti progress report ti nasao a pammaltog.#