Airport, seaport, naidagadag a mapadur-as

VIGAN CITY – Indagadag ni dati a Governor Luis “Chavit” Singson a padur-asen ti nasional a gobierno ti Vigan Airport ken seaport iti Cabugao agsipud ta umad-adu ti bilang dagiti turista nga agpasiar iti Vigan City manipud idi napili daytoy a maysa kadagiti New7Wonders Cities of the World.

Kinuna ti dati a gobernador a nupay adu dagiti nabangon nga otel, agkurkurang dagiti pasilidad iti yaadu dagiti turista nga agpasiar iti Vigan.

Kinuna ni Singson nga inkari ti national government ti pannaka-develop ti airport ken seaport, ket no saan, itedna koman a ti probinsia ti mang-develop agsipud ta adda met pondo a busbosenna para iti nasao a development.

Iti pannakapaliiw ti Semana Santa itay umuna a lawas ti Abril, simmuyop manen ti bilang dagiti turista iti Vigan City ket fully booked amin dagiti otel iti siudad isu a nagbirok pay dagiti sangaili iti pagdagusanda nga otel iti ruar ti siudad.

Manamnama ti panagdudupudop manen dagiti turista iti Vigan City iti panangselebrarna iti May Festival of the Arts a maigiddan iti pannakaideklarana a New7Wonders Cities of the World.#