Akimbalay nakakumpiskaan paltog, balbala, nakasuan

STA. MARIA, Ilocos Sur – Nasaklangan iti provincial fiscal’s office ti maysa a residente iti Barangay Cabaroan ditoy iti kaso a panaglabsing iti PD 1866 kas inamendar ti RA 8294  kalpasan a positibo ti resulta ti panagsukisok dagiti polis iti balayna a  nakakumpiskaan kadagiti paltog ken nadumaduma a balbala idi Hulio 21.

Maysa a Super 38 pistol, maysa a magazine assembly a naglaon iti lima a bala, maysa a holster, maysa a Mighty cigarette pack a naglaon iti 8 a bala, maysa a paper pack a naglaon iti 15 a bala ken maysa nga aluminum pack a naglaon iti 12 a bala para iti Super 38 ti nakumpiska dagiti polis bayat ti impakatda a search operation iti balay ni Michael D. Tablang a masarakan iti nadakamat a barangay.

Imet dagiti polis nga indauluan ni Police Senior Inspector Regino Mendoza Geñoso, Jr. ti search warrant nga inyisio ni Judge Sixto D. Diompoc ti RTC Branch 72, Narvacan idi napanda sinukisok ti balay ni Tablang.

Awan ni Tablang bayat ti panagsukisok dagiti polis nga inimatangan ni Barangay Captain Elsie Dacquel.#