Akinkukua iti getaway a motorsiklo a naaramat iti pammapatay, natuntonan dagiti polis

BANTAY, Ilocos Sur – Natuntonan dagiti inbestigador ti akinkukua iti motorsiklo nga inaramat dagiti agama a Henolino Sayo y Garcia, ken ti anakna a ni Noriel Sayo y Talania idi pinaltoganda ni Marcelino Presto, Jr. y Tugade, iti The Sisters Bibingka idi 2:06 ti malem ti Oktubre 6.

Kinuna dagiti polis a natuntonanda a maysa a lumugar iti Barangay Capangdanan ti akinkukua iti nalabaga nga XRM motorcycle a nagluganan dagiti agama a Sayo idi pinaltoganda ni Presto.

Gumatgatang ni Presto iti bibingka iti The Sisters Bibingka idi pinaltogan dagiti agama a nagsagrapan ti biktima kadagiti dunor iti nadumaduma a paset ti bagina a puon ti nakatayanna iti ospital a nakaitarayanna.

Nasugatan met dagiti agama idi nakipinnaltog ti polis ket naitarayda iti Metro Vigan Cooperative Hospital a pakaag-agasanda.

Nainget ti pannakabantay dagiti suspek para iti seguridadda.

Ngem kinuna dagiti inbestigador nga idi pinagsaludsodanda ti di nainaganan nga akinkukua, imbaga daytoy nga idi pay la 2007 nga inlakona ti nasao a motorsiklo ket mapapati a taga-Cabugao dagiti gimmatang.

Ngem segun iti akinkukua, saanna nga am-ammo dagiti gimmatang iti motorsiklona.
Kinuna dagiti inbestigador a kitkitaenda ti anggulo a natangdanan dagiti agama a Sayo a mangpapatay ken ni Presto.

Iti background investigation dagiti polis, naammuan a kameng idi ti laklakay a Sayo iti Sinco group, maysa a grupo dagiti gun for hire, malaksid a nakalista iti Cabugao police station a maysa a drug personality.

Awan pay ti maukag dagiti polis-Cabugao a kaso ti ub-ubing a Sayo.

Kabayatanna, sabali pay a paltog ti inreport dagiti inbestigador a nasarakanda iti compartment ti kotse ni Presto.

Iti progress report manipud iti Bantay Police Station ditoy, nakasarak dagiti inbestigador iti maysa a homemade buckshot 12 gauge (one pong) iti glove compartment ti nangisit a Honda Civic a kotse ni Presto, 41, PNP member a naka-assigned iti San Fernando City Police Station.

Daytoy ti maikalima a paltog a nasarakan iti lugan ti polis.

Iti inisial a panagpalutpot dagiti inbestigador kalpasan ti pannakapaltog ni Presto, nakasarakda iti uppat a paltog iti uneg ti lugan ti polis a pakairamanan ti pakaibilangan ti maysa a cal 9mm pistol a marka Beretta nga addaan iti 3 a short magazines ken 25 a bala; maysa nga M16 armalite rifle a marka Elisco nga addaan iti dua a long magazines ken 38 a bala; maysa a cal. 45 Colt pistol nga addaan maysa a short magazine ken 6 a bala; ken maysa a cal 38 revolver nga awanan iti serial number.

Agtultuloy ti panagimbestiga dagiti polis no asino ti nangtangdan kadagiti suspek a mangpatay iti polis.

Ngem nagtalinaed a sarado ti bibig dagiti agama malaksid ti naibalikas ti maysa a “narigat ti biag….”