Akinkukua iti pagletsonan ti manok, napapatay

MAGSINGAL, Ilocos Sur – Idi rabii ti Enero 11 iti Barangay San Basilio ditoy nga ili ti makuna a perpekto  a gundaway a panangisayangkat iti dakes a panggep: napigsa ti bayakabak, nasipnget ta awan ti koriente, ken awanen ti matatao iti dayta a lugar.

Malaksid nga agtudtudo, nagpukaw pay ti silaw ken awanen ti matatao idi agarup alas 8:06 ti nadakamat a rabii idi pinaltogan ti maysa nga armado a tao ni Gardelio Pabian Oandasan, 38, akinkukua iti Chook’s Lechon Manok, residente iti Barangay San Vicente, a puon ti nakatayanna.

Segun iti inisial nga inbestigasion dagiti polis, napasamak ti pammaltog iti national highway a sakup ti Barangay San Basilio ditoy met laeng nga ili bayat a nakalugan iti kotsena a Mitsubishi Galant.

Kinuna ni COP Police Chief Inspector Mamerto Taclas a rimmuar ni Oandasan iti luganna sa nagtaray a kumamang iti tiendana ngem sinurot ti suspek sana pinaltogan iti sumagmamano a daras agingga iti nadaleb ti biktima.

Naglibas ti suspek iti saan nga ammo a direksion kalpasan iti pammaltog.

Nakarekobre dagiti polis iti lima a kapsula ken maysa a buli a nagtaud iti cal 45 iti nakapasamak iti krimen.

Kinuna ni Taclas a nangisayangkaten dagiti kameng ti SOCO manipud iti Crime Laboratory a nakabase iti Camp Elpidio Quirino, Bulag, Bantay, Ilocos Sur iti inbestigasion para iti pannakarisut ti kaso.

Kinunana pay a maiwayat ti cross-matching dagiti kapsula a narekobre tapno maammuan no naaramatdan iti sabali a pammatay iti probinsia.

Awan pay ti anggulo ti pammapatay ngem nadakamat ti hepe a nagsina ti biktima ken ti asawana nga agtrabtrabaho iti ballasiw-taaw.#