Aksidente iti lugan, 3 natay, 1 nasugatan

CANDON CITY – Naideklara a natayen ti maysa a baro idinto a nakaro a nasugatan ti kasakayna idi nasapgid ti motorsikloda ti maysa a truck iti national highway a sakup ti Barangay Bagani Campo ditoy siudad idi tengnga ti rabii ti Disiembre 8.

Awanen ti biag ni Jun-Jun Quitoriano, 18, baro, residente iti Barangay Sabangan, Santiago, Ilocos Sur, idi maidanon iti Candon City Hospital, idinto a grabe ti sugat ni Nestor Sabado, Jr., 25, kalugaranna ket dagus a naiyalis iti Ilocos Training Regional Medical Center iti San Fernando City, La Union.

Segun iti kadua dagiti biktima a naglugan iti sabali a motorsiklo  a nabigbig a ni Jessie Garcia y Bonyales, 22, baro, kalugaran met laeng dagiti biktima, sakbay ti aksidente, agdaldaliasatda nga agpaamianan ket sarsarunuenda ti International trailer truck a minaneho ni Narciso Renato y Castaneda, 43, naasawaan, residente iti Barangay San Marcelino, Dingras, Ilocos Norte.

Mapapati a naginayad ti truck iti sanguanan ti kamposanto a sakup ti Barangay Bagani Campo ket nagobertek ti Honda Wave a minaneho ni Quitoriano ngem aksidente a nasapgidna ti kannawan a kutit ti truck a puon ti saan a pannakakontrol ti biktima iti manibela ti motorsiklona a puon ti nakadesgrasiaan ken nakaro a nakasugsugatanda.

Boluntario a simmuko ni Renato iti polis ditoy siudad.#