Aksidente ti pannakatay ni Tabula: polis Sto. Domingo

STO. DOMINGO, Ilocos Sur -Bimtak ti chamber ti daan a paltog idi naipaputok ket dagiti shrapnel ti naimula iti bagi ti biktima, daytoy ti rimmuar iti panagimbestiga dagiti polis mainaig iti pannakatay ti maysa a mannalon sadiay Barangay Lussoc, ditoy nga ili idi rabii ti Hunio 20.

Segun ken ni  Deputy Chief of Police P/Inspector Mariano Fagela, bimtak ti chamber ti paltog idi impaputok ni Conrado Jaramilla Tabula, 47, ken residente iti Barangay Paras ditoy nga ili ket simrek dagiti shrapnel iti barukong ti biktima a puon ti nakatayanna.

Kinuna ti deputy chief  of police a nupay adda panagduadua dagiti kabagian ti biktima iti napasamak, rumrummuar iti panagimbestigada a ti mismo a biktima ti nagpaputok iti paltog.

Innayonna a nagdisnudo ti kadua ti biktima idi mapasamak ti insidente a nagpa-paraffin test tapno maammuan no adda pulbora ti imana.

Nagresponde dagiti polis kalpasan a nakaawatda iti tawag manipud iti maysa a retired policeman nga adda shooting incident iti Barangay Lussoc a nagbeddengan ti Barangay Paras ken Barangay Burobor.

Segun ken ni deputy chief, nadatnganda ni Tabula a nakapakleb ken nadigos iti bukodna a dara.

Kinunana a nakitana a naburbor ti ima ti biktima ken nagsagrap iti sugat iti barukong ken dadduma a paset ti bagina.

Kasta met a nakakitada ti asideg ti biktima ti maysa a simmabog nga Springfield cal. 30 a paltog a napisi ti chamber ken kulatana.

Iti inisial nga inbestigasion dagiti polis, napan kinita ti biktima dagiti dinguenna iti kataltalonan ken nakadatnganna ken ni Salvador Tabula, 48, kapiduana.

Mapapati nga inawis ti biktima ni Salvador nga agpaputok iti paltog ngem insungbat daytoy nga iti adayo ti pagpaputokanna.

Mapapati a nagpaputok latta ti biktima ket idi mapan kitaen ni Salvador, nakaparintumeng daytoy idinto a mapapati a kinunana a “natamaannak metten”.

Nagpaarayat ni Salvador iti balay ti maysa a retirado a polis ket daytoy ti immawag iti police station.

Segun iti deputy COP, posible a gapu iti kinadaan ti pistolized a paltog ken panaglatlatina, saan a nakaruar ti buli idi naiputok, bimtak iti chamber a puon ti nakawaraanna ken nakasugsugatan ti biktima.

Nakarekobre dagiti inbestigador iti tallo a bala ti cal. 38 a naiwara iti nakapasamakan ti insidente ken walo a bala ti Garand Rifle iti bulsa ti biktima.

Saan a nasapulan dagiti polis ti kagudua ti barrel ti simmabog a paltog.#