Akusado iti 10 kaso ti panagrames, naaresto sadiay Pangasinan

SANTIAGO, Ilocos Sur – Kalpasan ti nasurok makatawen a panaglemmengna, natiliw met laengen ti maysa nga akusado iti panagrames ken maibilang a top 10 most wanted person iti rehion sadiay Barangay San Mariano, Sta. Maria, Pangasinan idi malem ti Agosto 20.

Inaresto dagiti nagtitipon nga elemento ti kapolisan a pakaibilangan ti Santiago police station nga indauluan ni COP Senior Inspector Roderick A. Vintero, Nagbukel police station nga indauluan ni Gerardo A. Antonio, dagiti operatiba manipud iti Provincial Intelligence Branch ken Provincial Investigation and Detective Management Branch babaen ti direkta a superbision ni Ilocos Sur Provincial Director PSSupt. Nestor Eswagen Felix ni Florencio Malbog, Jr. y Caducoy, 64, naasawaan, mannalon, ken residente iti Barangay Busel-Busel, Santiago, babaen ti bileg ti warrant of arrest nga inyisio ti korte ti Narvacan Regional Trial Court mainaig kadagiti agsusukot a kasona ti panagrames.

Sumangsango ni Malbog iti ten counts a kaso iti panagrames ken 5 a kaso ti act of lasciviousness. Nairekomenda nga agpiansa ni Malbog para iti temporario a wayawayana iti sag-P120,000.00 kadagiti kasona a panagrames nga agdagup iti P1.2 million ken sag-P36,000.00 kadagiti kasona iti act of lasciviousness nga agdagup iti P180,000.00 .

Kinuna ni Vintero, hepe ti polis ti Santiago, nga inyussuatda ti operasion kalpasan a nakaawatda iti impormasion manipud iti maysa nga inpormante nga adda ni Malbog sadiay Barangay San Mariano, Sta. Maria, Pangasinan, lugar a nakayanakanna.

Kinuna ni Vintero a dagus nga impatulodda ti report iti opisina ti PIB, Ilocos Sur PPO ket kalpasan ti pannakapatalged a positibo ti impormasion, naiyussuat ti surveillance a nagresulta iti pannakatiliw ni Malbog.

Nakalista ni Malbog a numero uno a wanted person iti ili ti Santiago ken maika-10 a top wanted person iti regional level gapu kadagiti kasona iti panagrames ken acts of lasciviousness.

Ngem impetteng ni Malbog bayat ti pannakipatang iti lokal a media kenkuana a nakasuan iti panagrames agsipud ta saanna a napautangan dagiti dadakkel dagiti ubbing a mapapati a biktimana.

Trabahador ti maysa a dati a mayor ni Malbog idi naisaklang iti agsusukot a kaso ti panagrames.

Kinuna ni Malbog a nagdisnudo dagiti ubbing nga aggian iti balayna agsipud ta adda makanda. Mapapati nga um-umian dagiti ubbing iti balayna ket maturogda iti salas.

Idi madamag no apay a naglemmeng iti San Mariano, kinuna ni Malbog a nakaron ti sakitna iti kidney ket gapu ta saanen a maagasan, naggawid iti lugarda tapno ditoyen ti pakatayanna.

Kabayatanna, tallo pay nga akusado iti panagrames ti inaresto dagiti polis sadiay Sta. Cruz, Salcedo, ken Sta. Maria, Ilocos Sur itay nabiit.

Inaresto dagiti polis-Sta. Cruz iti panangidaulo ni PInsp. Diony Victorio Balancio idi aldaw ti Agosto 20 ni Ludivico Abadilla, 44, sadiay Barangay Bugbuga, Sta. Cruz, babaen ti bileg ti warrant of arrest nga inyisio ni Judge Policarpio P. Martinez ti RTC Branch 23, Candon City.

Sumangsango iti kaso a panagrames iti Candon City, nakalista ni Abadilla a No. 9 most wanted person iti Sta. Cruz.

Sabali pay nga akusado iti panagrames, ni Juan Altura y Diego, Jr., 51, ti inaresto dagiti polis-Salcedo kas pammilin ni Judge Policarpio P. Martinez ti RTC Branch 71, Candon City.

Awan ti nairekomenda a piansa ni Altura gapu iti kasona a rape a naipababaen iti Criminal Case No. 3296-C; nairekomenda nga agpiansa iti kasona a rape by sexual assault babaen ti CC No. 3297-C, ken P200,000.00 para iti kasona nga acts of lasciviousness.

Kabayatanna, inaresto dagiti nagtitipon nga elemento ti Sta. Maria police station ken Ilocos Sur CIDG nga indauluan ni PCInspector Modesto F. Carerra ni Moises Tugade y Casio, 71, sadiay Barangay Nalvo idi malem ti Agosto 18.

Akusado ni Tugade iti rape (2 counts) ken lascivious conduct iti sala ni Judge Gina Juan-Chan ti RTC Branch 22, Narvacan.

 

Awan ti nairekomenda a piansana kadagiti kasona a rape idinto a P200,000.00 ti piansana iti lascivious conduct.

Nakalista met ni Tugade a No. 3 top most wanted person iti Santa Maria.#