Akusado iti illegal a panagrekrut, estafa, simmuko iti polis

STA. Maria, Ilocos Sur – Saanen nga inuray daytoy akusado iti sumagmamano a kaso a tiliwen dagiti polis, isu a mismon ti boluntario a simmuko iti police station ditoy.

Simmuko iti polis idi agarup 2:00 ti malem ti Pebrero 8 ni Joselyn Arevalo y Manipon, 42, naasawaan, Accounting consultant ken residente iti Brgy. Lubong, Sta. Maria, Ilocos Sur.

Adda warrant of arrest nga inyisio ni Judge Mona Lisa V. Tiongson-Tabora, Presiding Judge ti RTC Branch 7, Baguio City maikontra ken ni Arevalo a napetsaan Disiembre 11, 2015 gapu iti kasona a recruitment in large scale babaen iti Criminal Case No. 38470-R. Sabali laeng ti kasona nga estafa babaen ti CC Nos. 38471-R; 38472-R ken 38473-R.

Awan ti nairekomenda a piansa ni Arevalo mainaig iti kasona nga illegal recruitment idinto nga agpiansa iti tig-P40,000.00 iti tallo a kasona nga estafa.

Addan ti akusado iti kustodia ti polis ditoy para iti dokumentasion ken disposision.#