Akusado iti pammapatay, nasentensiaan iti reclusion temporal

TAGUDIN, Ilocos Sur – Kalpasan ti namindua a pannakaitantan ti promulgasion gapu iti saanna a panagparang iti korte, sinentensiaan  ti korte ditoy ti maysa nga akusado iti pammapatay iti reclusion temporal itay Oktubre 30 ken panagbayadna iti danios iti biktima.

Sinentensiaan ni Hues Melanio A. Rojas, Jr. ni Agusto Felipe, alias Buldog, 34, naasawaan, mannalon, iti walo a tawen ken maysa nga aldaw agingga iti 14 a tawen ken walo bulan ken agbayad iti P50,000 kas civil indemnity, ken P50,000 kas moral damages kalpasan a napaneknekan a nakabasol iti pannakapapatay ni Mike Lagasean, 25, baro, idi kanikalima a tawen.

Namindua a daras a naitantan ti pannakasentensia ni Felipe gapu iti saanna a panagparang iti korte.

Gapu itoy, imbilin ti korte ti pannakaaresto ti akusado idi Oktubre 10.

Nagpatulong ti ama ti biktima iti Media gapu iti mapapati a saan a pannakaaresto ti akusado iti baet a naipaima ti warrant of arrest iti hepe ti polis ti Cervantes, Ilocos Sur idi met laeng Oktubre 10, kas maibasar iti rekord ti korte.

Naidanon ti reklamo ti ama ti biktima ken ni PNP Provincial Director Police Senior Supt. Virgilio Fabros ket binilin daytoy ni Supt. Panfilo Racho, hepe ti provincial intelligence office, a mangiyimplimentar iti warrant of arrest maikontra iti akusado.

Itay Oktubre 23, naidatag ni Felipe iti korte sa naibalud iti BJMP ditoy nga ili a nangurayanna iti promulgasion ti kasona.

Segun iti rekord iti korte, manipud iti alas dies ti bigat agingga iti alas 6:00 ti malem idi Pebrero 20, 2002 a naggiinom ti akusado ken ni Lagasen, kaduada ti tallo pay a lallaki ken dua a babbai, iti maysa a videoke bar iti sitio Gitlangan, Barangay Comillas, Cervantes, Ilocos Sur .

Mapapati a di nagkinnaawatan da Felipe ken Lagasen gapu iti pannakapukaw ti maysa a di naluktan a botelia ti arak a nagtungpal iti panangbagsol ti akusado iti biktima.

Naitaray a dagus ti biktima iti Bessang Pass Memorial Hospital ngem  naideklara a natayen idi maidanon iti balay-pagagasan.

Depensa ti akusado a sinalaknibanna laeng ti bagina kalpasan ti mapapati a panangpalsiit ti biktima kenkuana ngem saan nga inawat daytoy ti korte.#