Akusado iti panaglabsing RA 9165, naaresto

CABUGAO, Ilocos SurInaresto dagiti polis sadiay Barangay Pug-os ditoy nga ili ti maysa nga akusado iti panaglabsing iti maiparparit a droga idi bigat ti Agosto 30, nakurang a tallo a tawen kalpasan a naiyisio ti pammilin ti korte a maaresto.

Inaresto dagiti polis ni Joey Fernandez y Esteban @ Tiwi, 35, awanan asawa, residente iti Barangay Quezon, Cabugao babaen ti bileg ti warrant of arrest nga inyisio ni Judge Nida Bringas Alejandro ti Branch 24, Regional Trial Court, Cabugao.

Sumangsango ni Fernandez iti panaglabsing iti Section 11 ti RA 9165 a nai-docket iti babaen ti CC No. 3026-KS ket nairekomenda nga agpiansa iti P200,000.00.

Ni Fernandez ti maika-6 iti listaan ti most wanted person iti babaen ti Manhunt Charlie, Drug Watchlist kas pusher ken Street Level Target iti police station ti Cabugao.

Idi pay la Septiembre 2013 ti pannakaiyisio ti warrant of arrest maikontra ken ni Fernandez.#