Akusado iti panagpalsipika iti dokumento, naaresto

CANDON CITY – Inaresto dagiti polis ti maysa a lalaki nga akusado iti panagpalsipika iti dokumento sadiay Barangay San Juan ditoy siudad idi malem ti Mayo 7.

Inaresto dagiti polis ni Felimon Torres y Gacoscos, 46, naasawaan, ken residente iti Barangay Tablac, Candon City babaen ti bileg ti warrant of arrest nga inyisio ni Judge Maria Celestina M. Cabaguio-Acal ti MTCC, Candon City idi Abril 29, 2014.

Sumangsango ni Torres iti kaso a falsification by a private individual and use of falsified documents iti babaen ti Criminal Case No. 5195, 5196 ken 5197 ket nairekomenda ti sag-P12,000.00 a piansana.

Dagus a nagresponde dagiti polis idi nakaawatda iti impormasion manipud iti maysa a kameng ti Barangay Intelligence Network a nakita ti suspek iti Barangay San Juan a nagresulta iti pannakaaresto ni Torres.

Naikustodia ti akusado iti Candon police station para iti umisu a disposision.#