Akusado iti panagtakaw, natiliw iti Abra

CANDON CITY –  Inaresto dagiti nagtipon a grupo dagiti polis ti Tayum, Abra ken ditoy siudad ti maysa nga akusado iti robbery sadiay Barangay Poblacion, Tayum, Abra idi malem ti Nobiembre 6.

Inaresto dagiti polis ni Franklin Gacilan y Tarona @ “Rambo”, 45, naasawaan, mannalon, ken residente iti Barangay Tamurong II, ditoy siudad idi agarup 2:00 ti malem ti nadakamat a petsa babaen ti bileg ti warrants of arrest nga inyisio da Judge Policarpio P. Martinez ti RTC Branch 71, Candon City ken Judge Richard T. Domingo ti MTCC, Candon City.

Sumangsango ni Gacilan iti robbery iti sala ni Judge Martinez ken iti theft iti sala ni Judge Domingo ket nairekomenda ti piansana a sag-tunggal P20,000.00.

Naikustodia ti akusado iti Candon Police Station.#