Footer

Akusado iti panagtakaw, panaghold-ap, ginudas armado a tattao

BANTAY, Ilocos Sur  -Maysa a suspetsa iti panagtakaw ken panaghold-ap ti pinapatay dagiti armado a tattao bayat ti panagurayna iti luganna iti Drive-Inn, ditoy nga ili idi.

Segun iti inisial nga inbestigasion dagiti polis ditoy, agur-uray   iti luganna a kaduana ti asawana ni Vergel Meneses Ramos, 31, residente iti Tondo, Manila, akusado iti panagtakaw a naangay iti maysa a kaparanget nga ili ditoy ken panaghold-ap iti Vigan City, idi kellaat nga inasitgan dagiti suspetsa sada pinalpaltogan.

Nairaman a nasugatan ti misisna idi pinanggep daytoy a sallukoban ti biktima.

Karuruar laeng ni Ramos iti pagbaludan iti Vigan City gapu iti kasona a panaghold-ap ken panagtakaw.

Positibo nga intudo ni Redentor Cardenas,   negosiante a residente iti Poblacion, San Vicente, Ilocos Sur a nanghold-ap kenkuana ket intarayna ti P90,000 a naglakuanna iti itlog.

Mapapati a karaman pay ni Ramos iti panagtakaw iti maysa a pagtagilakuan iti Vigan City a nakaitarayan iti bag ni Demetria Artates, akinkukua iti pagtagilakuan, a naglaon iti P50,000 a kuarta ken dadduma pay a napapateg a gamit.

Kinamakam ni Jennifer Artates, kaanakan a babai ti biktima, dagiti suspetsa ket nakitana a nagluganda iti maysa a van.

Nasarakan ti van a naabandona iti Barangay Tamag, Vigan City.

Maysa nga agpaspasada iti traysikel ti nangibaga nga inluganna dagiti suspetsa ket intulodna ida iti national highway ditoy nga ili. Kinuna ti drayber a naglugan dagiti suspetsa iti Dominion Bus nga agpaabagatan.

Nangipatulod dagiti polis iti flash alarm kadagiti kaparanget nga ili iti abagatan a pasardengenda ti nasao a bus.

Positibo nga intudo ni Artates dagiti suspetsa nga isuda ti simrek iti pagtagilakuan a nagpammarang a kas kustomer.

Kitkitaen dagiti inbestigador ti anggulo nga adda pakainaigan dagiti naisayangkat a panagtakaw ken hold-ap iti pannakapapatay ni Ramos.#