MAGSINGAL, Ilocos Sur – Inaresto ti composite team manipud iti CIDG – Region 2 ken dagiti polis-Magsingal ti maysa a mannalon nga akusado iti statutory rape sadiay Barangay Napu, ditoy nga ili idi agsapa ti Abril 9.

Naaresto ni Fredelito Dela Rosa y Ubarde babaen ti bileg ti warrant of arrest nga inyisio ni Judge Nicarnor S. Pascual, Jr. ti Regional Trial Court, Branch 8, Aparri, Cagayan gapu iti nadakamat a kasona a nai-docket iti babaen ti Criminal Case No. 11-13717.

Awan ti nairekomendar a piansa ni Dela Rosa.

Kalpasan a naaresto, naipan ni Dela Rosa iti Magsingal District Hospital para iti physical ken medical examination sa naipan iti police station para iti booking, pannakaretrato ken dokumentasion sakbay a maidatag iti maseknan a korte.

Ni Dela Rosa ti most wanted person ti Buguey, Cagayan kas binalidar ti Magsingal police station.#