Akusado iti robbery with homicide, naaresto

SANTA, Ilocos Sur – Inaresto dagiti elemento ti ISPPSC ken police station ditoy ti maysa a lalaki a sumangsango iti kaso iti pagtaenganna sadiay Barangay Manueva ditoy nga ili idi parbangon ti Disiembre 13.

Naaresto ni Wilson Soria y Bueza, 50, naasawaan, ken residente iti nadakamat a barangay iti imatang da Barangay Captain Percival Carreon ken ti asawana idi agarup 1:30 ti parbangon ti nadakamat a petsa.

Natiliw ni Soria babaen ti bileg ti alias warrant of arrest nga inyisio ni Judge Sixto D. Diompoc ti Regional Trial Court Branch 72, Narvacan, Ilocos Sur gapu iti kasona a robbery with homicide a nai-docket iti babaen ti Criminal Case No. 3488-N.

Awan ti nairekomenda a piansa para iti temporario a wayawaya ni Soria.#