Footer

Akusado nangpatay iti tesorero, nasentensian iti tungpal biag

SAN FERNANDO, La Union – Sinentensiaan ti korte ditoy iti tungpal biag ti akusado iti pammapatay iti maysa a tesorero kalpasan a napaneknekan a nakabasol iti nakaisaklanganna.

Sinentensiaan ni Judge Ferdinand Fe ti Regional Trial Court Branch 67 ni Rogelio Ordoña wenno Rogelio Albay iti reclusion perpetua wenno tungpal biag a pannakaibalud kalpasan a napaneknekan a nakabasol iti kaso a murder a naipila maikontra kenkuana.

Imbilin pay ti korte nga agbayad ti akusado iti nasurok P3.9 milion kas danios iti naulila a pamilia ti biktima.

Maipalagip a ni Albay ti naitudo a pimmaltog ken nangpapatay ken ni Felicidad Picar, municipal treasurer ti Bauang, La Union iti sanguanan ti balayda iti Barangay Santiago, idi agsapa ti Agosto 6, 2006.#