Alad

Imbiit ni Jobert M. Pacnis

INTUGAW ni Indung iti sirok ti bulala iti sakaanan ti bantay idi makagteng dita. Naktanganen ti takiagna a nagawit iti sanganayon a kawayan. Maikatlo daytoyen a panagsublina iti bantay.

Nabang-aran iti panangarakup kenkuana ti apagdillaw a pul-oy ti angin. Ala, aganuska, bagi, ta maudi daytoyen, kinunana iti nakemna. Dayta laengen agduagasut a metro a tambak dagiti talon ti daliasatenna makagtengton iti pagtaenganda.

Narukopen ti aladda a sumango iti kalsada. Masapul a lagdaannan daytoy tapno di nawaya a makastrek dagiti kalding ni Mang Sabas a karrubana nga iti laeng ballasiw ti kalsada ti balayda. Numona ket kapigsa dagiti mulana nga okra ken tarong ti agbunga.

Kayatna pay idi ti agmula iti patani iti nagsulian ngem inatipa ni baketna.

Pakaisarsarakam dayta,” kinuna daytoy. “Ammok ‘ta adda dita panunotmo.”

Wen, aklonenna, planona a yappan dagiti mulana a patani kadagiti kalding ti kaarrubada. Ta dina malipatan ti panangikisap dagitoy ti mulana a kamotit iti dayaen ti balayda.

Kinapatangna ni Mang Sabas kadayta a napasamak. Ngem kinuna ketdin daytoy a tarimaanenna ti agalad. Ta saan met nga amin a gundaway ket makitkitana dagiti tarakenna.

Diak met babaonen dagiti tarakenko nga umay agkaan kadagiti mulam,” kinunana pay.

Tapno di rumaba ti saritaan, saan latta idin a nagtagtagari.

Dagus a pinisakna iti apagkapat dagiti kawayan idi makadanon iti balayda. Naipasoknan idi pay kalman dagiti darekdek a pagikaptanna. Nakabamban payen iti paggalutna.

Madamanan nga ikapet ti maikadua a nagislana a kawayan idi nakadusngiit nga inaasitgan ni Mang Sabas.

Ne, napia man, Indung, ta lagdaam ‘ta aladyo,” imbannikes daytoy kenkuana.

Narasi ngaminen, ‘Nong,” insungbatna. Ken tapno di serken dagiti tarakenmo dagiti mulak, kunana koma pay ngem dina intuloy.

Inan-anom, aya, ta naglaka a rimmukop?”

Panawenna metten, a, nga agsukat, ‘Nong,” kinunana latta idinto nga itultuloyna ti ar-aramidenna.

Wenno gapu iti kanayonda a panangsarsarapa kenka no kasta a maassengka?” inggarakgak kenkuana ni Mang Sabas.

Maysa, kinuna ni Indung iti nakemna.

Wenno,” inkapsut ni Sabas ti timekna; nagtalatalangkiaw, “isut’ sumarsariam no kasta a mapanka dita yan da Mayyang?” insungona iti daya.

Dua, inngayemngemna. “Ti la masasaom, ‘Nong,” ngem kinunana laeng. “Mangngegnaka ni baket. Naimbag koma met no adda kinaagpaysona dayta.”

Apay, nagbiddutak kadi?”

Ngem saannan a sinungbatan ti surdo ni Mang Sabas. Isu met a sumungad iti daya da Mayyang ken ti kasinsinna a balasitang. Mapanda la ketdi gumatang iti kantina ni Manang Roma dita laud.

Naggagetkan, aya, Manong,” inyisem kenkuana ni Mayyang.

Sammet, ading,” kinunana. Bolaenna koma ngem di met pay pimmanaw ti puor ti kararuana a ni Mang Sabas.

Me-ekkk! Me-ekkk!” agsasaruno dagiti kalding ni Mang Sabas a naggapu iti laud. Tartaraigidenda ti kalsada.

Addaytan dagiti tarakenmo, ‘Nong Sabas,” kinuna ni Indung bareng pumanawen ti kagurgurana la unay a kaarrubana.

Bay-am ida,” kinuna ketdin daytoy. “Ammoda ti pagawidanda. Agballasiwda laeng met.”

Ngem imbes a bumallasiwda, dinarasda ketdi ti simrek iti inaladan da Indung.

Naisardeng ni Indung ti ar-aramidenna. Binugawna dagiti kalding. Ni Mang Sabas, nakaisem laeng.

Nagbayagkanto met ngamin ita nga agalad,” nakunana pay laeng.

Tallo, nakunana iti nakemna. Ngem intuloyna nga inabog dagiti kalding. Pinidutna ti nagputdanna iti kawayan. Dagus a nagtataray dagiti kalding a nakakita kenkuana. Agturongda iti kalsada. Labsandan ti amoda.

Iskriiitttssssss!!!

Uray la naganit-it ti van a nagpreno. Ngem nagam-udanna ti dua kadagiti kalding. Naulantak a dagus dagitoy. Nagkuyegyegda la’t namindua, nagsalungayngaydan.

Nabati a nakanganga ni Mang Sabas. Insiwet metten ti van ti pimmanaw.

Igalutyo dagita tarakenyo!” naala pay laeng ti drayber nga imbugkaw.

Ania daydiay?” dagus a rimmuar ni Osang nga asawa ni Indung. Naipasabat kenkuana dagiti kalding nga ukoden ni Mang Sabas. “Sayang,” inngilangilna.

Gunggonam, inrag-o met ti uneg ni Indung.

Ala, ituloymon ‘ta aramidmo, sika!” nakigtot ni Indung iti kellaat a panangbugkaw ni baketna. “Sayaatem ti manglagda ‘ta alad. Siguraduem a diak nalaka a mapag-ot a panglabak kenka no naassengka a sumangpet!” Sa nagdardarasen a simrek iti balayda.

Nakita laengen ni Indung ti panagayek-ek da Mayyang.

Ha-ha-ha!!!” naala pay laeng ni Mang Sabas ti nangpaggaak kenkuana. “Umaykanto no malmalem, Indung, ta agassengta!” inggarakgak daytoy kenkuana. “Pulotanenta dagitoy kalding!”#