Aldaw ti Propesyonal, insayangkat ti PRC Baguio

BAGUIO CITY – Insayangkat ti Professional Regulation Commission (PRC) Baguio Regional Office ti Aldaw ti Propesyonal iti dua a siudad iti Ilocos idi Agosto 25 ken 26.

Segun iti PRC Baguio, naisayangkat ti Aldaw ti Propesyonal  manipud iti alas 8:00 ti bigat agingga iti alas 5:00 ti malem ti Agosto 25 sadiay Mariano Marcos State University, College of Teacher Education, Laoag City ken manipud iti alas 10:00 ti bigat agingga iti alas 5:00 ti malem ti Agosto 26 sadiay University of Northern Philippines (UNP), Vigan City.

Naipaay kadagitoy a petsa dagiti sumaganad a serbisio: aplikasion para licensure examinations (nurses, criminologists, CPA, ken dadduma pay); rehistrasion iti lisensia dagiti kabarbaro a nakaruat iti eksamin (nurses, agriculturists, kdpy.); pannakapabaro ti professional ID; sertipikasion ti good standing; ken pannakaited dagiti saan pay a naala a professional ID cards ken Board certificates a naipila iti PRC Baguio City.

Naipaay dagitoy a serbisio babaen ti pannakikoordinar ti Philippines Nurses Association ken dagiti nasao a dua nga unibersidad.#